ප්‍රංශයේ පොන්ටෝ – කොම්බෝ (Pontault-Combault) නගරයේ නියෝජ්‍ය නගරාධිපති ධුරයට ශ්‍රී ලංකා සම්භවයක් ඇති 25 හැවිරිදි තරුණ දේශපාලනඥවරියක් වන අතිතියා ආනන්දරාජා පත් කර තිබේ.
ශ්‍රී ලංකාවේ පැවති යුදමය වාතාවරණය හේතුවෙන් ඇය තම දෙමාපියන් සමඟ ප්‍රංශයට සංක්‍රමණය වී ඇත. වයස අවුරුදු 19 දී නගර සභා මන්ත්‍රීවරියක් ලෙස ඇය සිය දේශපාලන ගමන ආරම්භ කළාය.
ඇයගේ කැපවීම සහ පොදු සේවයට ඇති උනන්දුව හේතුවෙන් ප්‍රංශ දේශපාලන ක්ෂේත්‍රයේ ඇය ඉහළ ඇගයීමකට ලක්ව සිටී. මෑතකදී පැවති නගර සභා මැතිවරණයෙන් ජයග්‍රහණය කිරීමෙන් අනතුරුව 2026 මාර්තු මාසයේදී ඇය මෙම නියෝජ්‍ය නගරාධිපති ධුරයට පත් කර ඇත.
කයිට්ස් ප්‍රදේශයෙන් ආරම්භ වූ ඇයගේ පවුල් පසුබිම, දේශපාලනය සහ පොදු සේවය කෙරෙහි ඇති ඇයගේ උනන්දුව වර්ධනය කිරීමට හේතු වී ඇතැයි ඇය ප්‍රකාශ කරයි.
2020 සිට 2026 දක්වා කාලය තුළ ඇය තරුණ කටයුතු සම්බන්ධයෙන් නගර සභා මන්ත්‍රීවරියක් ලෙස කටයුතු කරමින්, වයස අවුරුදු 11 සිට 17 දක්වා තරුණයන් සඳහා වැඩසටහන් ක්‍රියාත්මක කිරීම සහ පරිසරය හා ආබාධිත පුද්ගලයන් සමාජගත කිරීම පිළිබඳ දැනුවත් කිරීමේ වැඩසටහන් රැසක් සංවිධානය කර ඇත.
නව ධුරය තුළ ඇය ප්‍රාදේශීය පාලනය සහ ප්‍රජා සංවර්ධනය කෙරෙහි වැඩි අවධානයක් යොමු කරනු ඇතැයි අපේක්ෂා කෙරේ.