දශක තුනක් තුළ ඉන්දියාවේ සිදුවූ දරුණුතම ගුවන් අනතුර සනිටුහන් කරමින්, බෝයිං 787 වර්ගයේ ගුවන් යානයක් අහමදාබාද් නගරයේ ගුවන් තොටුපළෙන් ගුවන් ගත වී සුළු මොහොතකට පසු කඩා වැටීමෙන් සති දෙකකට පසුව, එයාර් ඉන්දියා 171 ගුවන් යානයේ ඛේදවාචකයේ වෛද්‍ය පරීක්ෂණ අවසන් බවත් මරණ සංඛ්‍යාව 260ක් බව ගුජරාටයේ නිලධාරීන් නිවේදනය කර තිබෙනවා.

ගුවන් යානයේ සිටි මගීන් සහ කාර්ය මණ්ඩල සාමාජිකයින් 241 දෙනෙකු සහ බිම සිටි පුද්ගලයින් 19 දෙනෙකුගෙන් සමන්විත, 260 දෙනෙකු වූ මෙම අවසන් මරණ සංඛ්‍යාව, මූලික ඇස්තමේන්තුව වූ මරණ 270 ට වඩා අඩු අගයක්.

“ගුවන් අනතුරෙන් මියගිය සංඛ්‍යාව 260 කි. අපි විපතට පත්වූවන්ගේ අනන්‍යතාවයන් හෙළි නොකරන්නෙමු. සියලුම මළ සිරුරු සොයාගෙන හඳුනාගෙන ඇති අතර, ඒ සියල්ලන්ගේම මෘත දේහ ඔවුන්ගේ පවුල්වලට භාර දී ඇත” ලෙසයි සෞඛ්‍ය හා පවුල් සුභසාධන අතිරේක ප්‍රධාන ලේකම් ධනංජේ ද්විවේදි පවසා ඇත්තේ.

අහමදාබාද් සිවිල් රෝහලේ ප්‍රධානී වෛද්‍ය රාකේෂ් ජෝෂි ප්‍රකාශ කළේ, සියලුම මෘත දේහ DNA ගැලපීම සහ මුහුණු හඳුනාගැනීමේ තාක්ෂණය භාවිතයෙන් හඳුනාගෙන සත්‍යාපනය කළ බවයි.

“මගියෙකුගේ අවසන් මළ සිරුර සිකුරාදා රාත්‍රියේ ඩී.එන්.ඒ. ගැලපීමක් මඟින් හඳුනාගනු ලැබුවා,” යැයි වෛද්‍ය ජෝෂි පැවසුවේ.

ලන්ඩන් බලා පියාසර කරමින් තිබූ බෝයිං 787-8 ඩ්‍රීම්ලයිනර් යානය ජූනි 12 වන දින සර්දාර් පටෙල් ජාත්‍යන්තර ගුවන්තොටුපළෙන් ගුවන් ගත වී තත්පර 30කට පමණ පසු වෛද්‍ය විද්‍යාලයක නේවාසිකාගාර සංකීර්ණයක ගැටී ඇති අතර, එමගින් ගොඩනැගිල්ලේ කොටස් විනාශ වී යානය ගිනිගෙන තිබෙනවා.

විපතට පත්වූවන් අතර කනිෂ්ඨ වෛද්‍යවරුන්, රෝහල් සංකීර්ණයේ කාර්ය මණ්ඩලය සහ පහළ වීදියේ සිටි පුද්ගලයින් ද වුණා.

එක් මගියෙකු, දැවෙමින් තිබූ යානයේ සුන්බුන් වලින් ඈතට විසිවීම හේතුවෙන් අනතුරින් දිවි ගලවාගෙන ඇවිද ගොස් ඇති අතර, එය දෛවෝපගත ගැලවීමක් ලෙස විස්තර වුණා.

ගැටුමේ බලපෑම සහ ඉන් අනතුරුව ඇතිවූ ගිනි ජාලාව හේතුවෙන්, බිම සිටි මරණ 19 හැරුණු විට අනෙකුත් බොහෝ දෙනාගේ සිරුරු හඳුනාගත නොහැකි මට්ටමක පැවතුණා.

ඒ හේතුවෙන්, අනන්‍යතාව තහවුරු කිරීම සඳහා පවුලේ සාමාජිකයන්ගෙන් ඩී.එන්.ඒ. සාම්පල ලබා ගැනීමට නිලධාරීන්ට සිදුවුණා.

“සිව් දෙනෙකු ජීවතුන් අතර සිටියදී රෝහලට ගෙන ආ නමුත්, ප්‍රතිකාර ලබමින් සිටියදී ඔවුන් තුවාල හේතුවෙන් මිය ගියා. සමස්තයක් වශයෙන් පුද්ගලයින් 71 දෙනෙකු තුවාල ලබා රෝහල් ගත කර ඇති අතර, ඔවුන්ගෙන් බොහෝ දෙනෙකුට අහමදාබාද් සිවිල් රෝහලේදී සහ සෙසු අයට සයිඩස්, කේ.ඩී. සහ ඇපලෝ රෝහල්වලදී ප්‍රතිකාර ලබා දුන්නා. ඔවුන්ගෙන් රෝගීන් 67 දෙනෙකු මේ වන විට වෛද්‍ය පහසුකම්වලින් පිටව ගොස් තිබෙනවා,” යැයි ද්විවේදි මහතා පැවසුවා.

මේඝානිනගර් හි අනතුර සිදුවූ ස්ථානයෙන් සිරුරු කොටස් 318ක් සොයා ගත් බව නම හෙළි නොකිරීමේ කොන්දේසිය මත ජ්‍යෙෂ්ඨ පොලිස් නිලධාරියෙකු සඳහන් කළා.

මෙම සිද්ධීන් සම්බන්ධයෙන් කටයුතු කළ එක් අධිකරණ වෛද්‍ය විශේෂඥයෙකු පැවසුවේ, පසුව සොයාගත් ජීවී කොටසක් කිසිදු ගැලපීමක් නොපෙන්වූ පසු දිරාපත් වූ සාම්පලයකින් තොරතුරු ලබා ගැනීමට නැවත නැවතත් දැරූ උත්සාහයකින් අනතුරුව එය පක්ෂියෙකුගේ බව තහවුරු වූ බවයි.

මළ සිරුරු ප්‍රාන්ත සහ රටවල් කිහිපයකට යවා ඇති අතර, ඉන් වැඩිම සංඛ්‍යාවක් වන 73ක් අහමදාබාද් වෙත ද, අනන්ද් වෙත 29ක් ද, වඩෝදරා වෙත 24ක් ද ලැබී ඇත. සිරුරු දහතුනක් එක්සත් රාජධානියට යවා තිබෙනවා.

ඉන්දියාවේ ගුවන් යානා අනතුරු විමර්ශන කාර්යාංශය, එක්සත් ජනපදයේ ජාතික ප්‍රවාහන ආරක්ෂක මණ්ඩලයේ සහ බ්‍රිතාන්‍ය විමර්ශකයින්ගේ සහාය ඇතිව විමර්ශනය මෙහෙයවනවා.

ගුවන් දත්ත පටිගත කිරීමේ යන්ත්‍ර දෙකම අනතුර සිදුවූ ස්ථානයෙන් සොයාගෙන ඇත. ඒ සම්බන්ධ අවසන් වාර්තා තවම ඉදිරිපත්ව නැහැ.