හාවඩ් විශ්ව විද්‍යාලයේ අධ්‍යාපනය හැදෑරීම සඳහා විදේශිකයන් ඇතුළත් වීම තහනම් කිරීමට ඩොනල්ඩ් ට්‍රම්ප් ජනාධිපතිවරයාගේ සැලැස්ම තාවකාලිකව අත්හිටුවන නියෝගය තවදුරටත් දීර්ඝ කිරීමට කටයුතු කරන බව අමරිකානු ෆෙඩරල් විනිසුරුවරියක ප්‍රකාශ කරනවා.

ඒ අනුව මෙය දීර්ඝකාලීන තහනමක් පැනවිය යුතුද යන්න පිළිබඳව තීරණයක් ගන්නා තෙක් මෙම තාවකාලික දීර්ඝ කිරීම සිදු කෙරෙනු ඇත.

අමෙරිකානු දිස්ත්‍රික් විනිසුරු ඇලිසන් බරෝස්, බොස්ටන් නුවර පැවති හාවඩ් විශ්ව විද්‍යාලයේ නීතිමය අභියෝගය පිළිබඳ විභාගයේ අවසානයේ, බ්‍රහස්පතින්දා කල් ඉකුත් වීමට නියමිතව තිබූ තාවකාලික නිවාරණ නියෝගය ජූනි 23 දක්වා දීර්ඝ කළා.

ඇය ප්‍රකාශ කළේ තීරණයක් පිළියෙල කිරීම සඳහා වැඩි කාලයක් ලබා ගැනීමට අවශ්‍ය බවයි.

විනිසුරුවරිය මෙම විභාගය නියම කළේ ජූනි 5 වැනිදා තාවකාලික නිවාරණ නියෝගයක් නිකුත් කිරීමෙන් පසුව, ට්‍රම්ප් එදිනට පෙර දිනයේ අත්සන් කළ ප්‍රකාශනය ක්‍රියාත්මක කිරීම වැළැක්වීමටයි. මූලික තහනම් නියෝගයක් හාවඩ්හි නඩුව ඉදිරියට යන අතරතුර දීර්ඝකාලීන සහනයක් ලබා දෙනු ඇති.

මෑත අධ්‍යාපන වසරේදී හාවඩ් විශ්ව විද්‍යාලයට සාමාන්‍යයෙන් ජාත්‍යන්තර සිසුන් 6,800ක් පමණ සහභාගී වූ අතර, එය මැසචුසෙට්ස් ප්‍රාන්තයේ කේම්බ්‍රිජ්හි පිහිටි මෙම ප්‍රතිෂ්ඨාපිත විශ්ව විද්‍යාලයේ සිසුන්ගෙන් 27% ක් පමණ වනවා.

විශ්ව විද්‍යාලයේ නීතිඥ ඉයාන් ගර්ෂෙන්ගෝන් පැවසුවේ ට්‍රම්ප් මෙම ප්‍රකාශනයට අත්සන් තැබුවේ එක්සත් ජනපද ආණ්ඩුක්‍රම ව්‍යවස්ථාවේ පළමු සංශෝධනය යටතේ නිදහස් කථනයේ අයිතිවාසිකම් උල්ලංඝනය කරමින් හාවඩ් විශ්ව විද්‍යාලයට පළිගැනීමක් ලෙස බවයි.

මෙය සිදු වූයේ පාලන තන්ත්‍රයේ ඉල්ලීම්වලට අනුව විශ්ව විද්‍යාලයේ පාලනය, විෂය මාලාව සහ එහි ආචාර්යවරුන් හා සිසුන්ගේ මතවාදය පාලනය කිරීමට ඉඩ නොදීම නිසායි.

ට්‍රම්ප් පරිපාලනය ඇමරිකාවේ පැරණිතම හා වඩාත්ම පොහොසත් විශ්ව විද්‍යාලයට එරෙහිවීම හේතුවෙන් නීතිමය අභියෝග රැසක් මතුවී තිබෙනවා.