ශ්‍රී ලංකාවේ විභාග දෙපාර්තමේන්තුවේ නව විභාග කොමසාරිස් ජනරාල් ලෙස ඒ. කේ. සුභාෂිණි ඉන්දිකා කුමාරි ලියනගේ මහත්මිය පත් කර තිබෙනවා.
මෙය ඉතිහාසයේ සුවිශේෂී සන්ධිස්ථානයක් වන අතර, ඇය මෙරට 11 වැනි විභාග කොමසාරිස් ජනරාල්වරිය මෙන්ම, මෙම තනතුර හෙබවූ ප්‍රථම කාන්තාව ලෙස ඉතිහාසයට එක්වනවා.
මෙම පත්වීම ශ්‍රී ලංකාවේ අධ්‍යාපන ක්ෂේත්‍රයේ ස්ත්‍රීන්ගේ නායකත්වය සහ බලගැන්වීම පිළිබඳ ආදර්ශමත් ලකුණක්.
සුභාෂිණි ඉන්දිකා කුමාරි ලියනගේ මහත්මිය සිය ප්‍රාථමික අධ්‍යාපනය ආරම්භ කළේ මාපලගම මධ්‍ය මහ විද්‍යාලයෙන් වනවා.
පසුව, ගාල්ල සංඝමිත්තා බාලිකා විද්‍යාලයෙන් මුලික හා උසස් පෙළ අධ්‍යාපනය හැදෑරූ ඇය, එහිදී ඉහළ ශාස්ත්‍රීය ප්‍රතිඵල අත්කර ගනිමින් තම දක්ෂතාවය ඔප්පු කළාය.
ඉන් අනතුරුව, රුහුණ විශ්වවිද්‍යාලයෙන් විද්‍යාවේදි උපාධියක් හිමිකර ගත් ඇය, කොළඹ විශ්වවිද්‍යාලයෙන් අධ්‍යාපනපති උපාධියක් සහ පශ්චාත් අධ්‍යාපන ඩිප්ලෝමාවක් ද, කැලණිය විශ්වවිද්‍යාලයෙන් වාග් විද්‍යාව පිළිබඳ ශාස්ත්‍රපති උපාධියක් ද, ජාතික අධ්‍යාපන ආයතනයෙන් අධ්‍යාපන කළමනාකරණය පිළිබඳ පශ්චාත් උපාධි ඩිප්ලෝමාවක් ද ලබා ගනිමින් ඇගේ ශාස්ත්‍රීය හැකියාවන් තවදුරටත් ඔප් නංවා ගත්තා. මෙම බහුවිධ ශාස්ත්‍රීය පසුබිම ඇයව අධ්‍යාපන ක්ෂේත්‍රයේ ඉහළ තනතුරකට සුදුසුකම් ලත් නිලධාරිනියක බවට පත් කර තිබෙනවා.
ඇයගේ වෘත්තීය ජීවිතය 1998 වසරේදී ගුරුවරියක ලෙස ආරම්භ වූ අතර, එම කාලයේදී ඇය තම ඉගැන්වීමේ කුසලතාවයන් හා නායකත්ව ගුණාංග ඔප් නංවා ගත්තා.
පසුව, විභාග දෙපාර්තමේන්තුවට එක්වූ ඇය, එහි වසර හතරක සේවා කාලයක් තුළ විභාග කොමසාරිස්වරියක ලෙස කටයුතු කරමින්, විභාග පැවැත්වීම, කළමනාකරණය කිරීම සහ ප්‍රතිපත්ති සැකසීම වැනි වැදගත් කාර්යයන්හි තම දක්ෂතාවය පෙන්වූවාය. ඇයගේ කැපවීම, විනය සහ විභාග ක්‍රියාවලියේ අඛණ්ඩතාව ආරක්ෂා කිරීමට ඇති හැකියාව මෙම ඉහළ තනතුරට ඇයව යෝග්‍ය තේරීමක් බවට පත් කළා.
මීට පෙර විභාග කොමසාරිස් ජනරාල් ලෙස කටයුතු කළ එච්. ජේ. එම්. සී. ඒ. ජයසුන්දර මහතාගේ සේවා කාලය 2025 මැයි මාසයේදී අවසන් වූ අතර, එම තනතුරේ ඇබැරැත්ත හිමිවූයේ සුභාෂිණි ඉන්දිකා කුමාරි ලියනගේ මහත්මියටයි.
ඇය මෙම තනතුරේදී, ශ්‍රී ලංකාවේ ජාතික විභාග පද්ධතියේ විනිවිදභාවය, විශ්වසනීයත්වය සහ කාර්යක්ෂමතාව තහවුරු කිරීමේ වගකීම භාර ගනු ඇති.
මෙම පත්වීමත් සමඟ, ඇය ශ්‍රී ලංකාවේ අධ්‍යාපන ක්ෂේත්‍රයේ ඉහළම තනතුරකට පත්වූ ප්‍රථම කාන්තාව ලෙස ඉතිහාසයේ රන් අකුරින් සටහන් වනු ඇති.
ඇගේ නායකත්වය යටතේ, විභාග දෙපාර්තමේන්තුව නව යුගයකට ඇතුළු වනු ඇතැයි බලාපොරොත්තු වන අතර, ඇයගේ අත්දැකීම්, ශාස්ත්‍රීය පසුබිම සහ කැපවීම මඟින් එම ආයතනයේ ඉදිරි ගමනට ශක්තියක් වනු ඇති.
