ජම්මු කාෂ්මීරයේ පහල්ගම් ප්‍රදේශයට එල්ල වූ ත්‍රස්ත ප්‍රහාරය පිටුපස පාකිස්ථාන රජය සහ බුද්ධි අංශ සිටින බවට ඉන්දියාව එල්ල කරන චෝදනා සම්බන්ධයෙන් ජාත්‍යන්තර විමර්ශනයක් පැවැත්විය යුතු බව පාකිස්ථාන රජය පවසනවා.
පාකිස්ථාන ආරක්ෂක අමාත්‍ය කවාජා මුහම්මද් අසීෆ් මේ බව සඳහන් කර ඇති බවයි විදෙස් වාර්තාවල දැක්වෙන්නේ.
එලෙස ජාත්‍යන්තර විමර්ශනයක් සිදුකරනවා නම් ඊට පකිස්ථාන රජයේ සම්පූර්ණ සහාය ලබාදෙන බවයි ආරක්ෂක අමාත්‍යවරයා පවසා ඇත්තේ.
මේ අතර මෙම ත්‍රස්ත ප්‍රහාරයත් සමඟ ඉන්දියාව සහ පාකිස්ථානය අතර ඇතිව තිබෙන මතභේදත්මක තත්ත්වය උපරිම සංයමයකින් විසඳා ගන්නා ලෙස එක්සත් ජාතීන්ගේ සංවිධානය ඉල්ලා තිබෙනවා.
එම සංවිධානය දෙරටෙන්ම ඉල්ලා ඇත්තේ ගැටුම් තවත් උග්‍ර නොවීමට වගබලා ගන්නා ලෙසයි.
එමෙන්ම ඕනෑම ගැටලුවක් අන්‍යෝන්‍ය මැදිහත්වීමක් හරහා සාමකාමීව විසඳා ගැනීම කළ හැකි බව ද එක්සත් ජාතීන්ගේ සංවිධානය දෙරටටම අවධාරණය කර දී තිබෙනවා.
