ඉන්දියාවේ ග්‍රාමීය කාන්තාවන් කණ්ඩායමක් ආදායමක් සහ යම් ස්වාධීනත්වයක් උපයා ගැනීමට අනපේක්ෂිත මාවතක් සොයාගෙන තිබෙනවා.

ඒ කෘෂිකාර්මික භාවිතය සඳහා ඩ්‍රෝන යානා ක්‍රියාත්මක කිරීමයි.

අගමැති නරේන්ද්‍ර මෝදිගේ රජය 2023 දී මෙම “ඩ්‍රෝන් ඩිඩි” නැතහොත් “ඩ්‍රෝන් සහෝදරියන්” වැඩසටහන දියත් කළ අතර මේ වන විට ඩ්‍රෝන 500 ක් බෙදා හැර ඇති බව කෘෂිකර්ම අමාත්‍යාංශය දෙසැම්බර් මාසයේදී පාර්ලිමේන්තුවේදී ප්‍රකාශ කළා.

කෘෂිකාර්මික සේවා සැපයීම සඳහා කාන්තාවන් ප්‍රමුඛ කණ්ඩායම්වලට ඩ්‍රෝන යානා ලබාදීම, ඔවුන් සවිබල ගැන්වීම සහ කෘෂිකාර්මික කාර්යක්ෂමතාව ඉහළ නැංවීම අරමුණු කරගනිමින් එවැනි උපකරණ 15,000ක් බෙදා හැරීමේ ඉලක්කයක් වී ඇති බවයි පැවසෙන්නේ.

ගොවි බිම්වලට පළිබෝධනාශක සහ පොහොර ඉසීමට 25 kg සහ 35 kg අතර බරින් යුත් කාර්මික ප්‍රමාණයේ ඩ්‍රෝන යානා භාවිතා කරනු ඇති.

ඩ්‍රෝන යානාවලට දිනකට අක්කර 10ක් (හෙක්ටයාර 4ක්) පමණ භූමි ප්‍රමාණයක් ආවරණය කළ හැකි බවත්, එයින් රුපියල් 4,500ක් දක්වා උපයා ගත හැකි බවත් එම කාන්තාවන් පවසනවා.