ලබන වසරේ පෙබරවාරි මාසයේදී පාකිස්තානයේදී පැවැත්වීමට නියමිත ශූරයන්ගේ කුසලාන තරගාවලියට ඉන්දීය කණ්ඩායම සහභාගි වන්නේද නැද්ද යන්න පිළිබඳව දෙරටේ ක්‍රිකට් පාලක මණ්ඩල අතර නැවතත් සීතල යුද්ධයක් ආරම්භ වීමට නියමිත බව වාර්තා වනවා.
කෙසේවෙතත් මේ මස 19 වැනිදා සිට 22 දා දක්වා කොළඹදී පැවැත්වෙන අන්තර්ජාතික ක්‍රිකට් සභාවේ මහ සභා රැස්වීමේදී ඒ සම්බන්ධයෙන් සාකච්ඡා කිරීම න්‍යාය පත්‍රයට ඇතුළත් නොවූවත්, නිල නොවන මට්ටමින් එය ප්‍රධාන මාතෘකාව වීමට ඇතැයි අන්තර්ජාතික වාර්තා වලින් පැවසෙනවා.
ලබන වසරේදී පැවැත්වෙන ශූරයන්ගේ කුසලාන තරගාවලිය සඳහා ඉන්දීය කණ්ඩායමේ පාකිස්තානු සංචාරයට ඉන්දීය රජයේ අනුමැතිය මෙතෙක් හිමිවී නැත. ඉන්දියානුවන් බහුතරයකගේ මතය වන්නේත් ශූරයන්ගේ කුසලාන තරගාවලිය සඳහා ඉන්දීය කණ්ඩායම පාකිස්තානයට යා යුතු නැති බවයි.
තත්ත්වය වඩාත් උග්‍ර වුවහොත් 2025 ශූරයන්ගේ කුසලාන තරගාවලිය හෝ එහි තරග කිහිපයක් එක්සත් අරාබි එමීර් රාජ්‍යයට නැතහොත් ශ්‍රී ලංකාවට මාරු කිරීමට සිදුවිය හැකියි.
ඊට ප්‍රධාන හේතුව වන්නේ ඉන්දියාව සහ පාකිස්තානය යන රටවල් දෙකින් එකක් හෝ නැතිව ශූරයන්ගේ කුසලාන තරගාවලිය පැවැත්වීමට අන්තර්ජාතික ක්‍රිකට් සභාවේ රූපවාහිනී අයිතිවාසිකම් හිමි හිමි සමාගම එකඟ නොවීමයි.
නවතම එක්දින අන්තර්ජාතික ශ්‍රේණිගත කිරීම් අනුව ඉන්දියාව මේ වන විට 1 වැනි ස්ථානයේ සිටින අතර පාකිස්තානු කණ්ඩායම 4 වැනි ස්ථානයේ සිටිනවා.
මෙම ශ්‍රේණිගත ස්ථාන වලින් කියැවෙන්නේ ඔවුන්ගේ ක්‍රිකට් දස්කම්වල සාර්ථකත්වයයි.
ශ්‍රේණිගත කිරීම් අනුව මෙම කණ්ඩායම් දෙක කොතැනක සිටියත් ඉන්දු – පාකිස්තානු තරගයක් ලෝකයේ කොතැනක පැවතියද, ඒවා අති විශාල ප්‍රේක්‍ෂක අවධානයක් දිනාගන්නකි. දෙරට අතර පවතින දේශපාලනික එදිරිවාදීකම ඊට ප්‍රධානතම හේතුවයි.
අන්තර්ජාතික ක්‍රිකට් සභාවේ වාර්ෂික සැසිවාරයට සහභාගි වීම සඳහා ඉන්දීය ක්‍රිකට් පාලක මණ්ඩලයේ ලේකම් ජේ ෂා මහතා සහ පාකිස්තානු ක්‍රිකට් පාලක මණ්ඩලයේ සභාපති මොෂින් නක්වි මහතා අද (බ්‍රහස්පතින්දා) ශ්‍රී ලංකාවට පැමිණීමට නියමිතයි.
ජේ ෂා මහතා අන්තර්ජාතික ක්‍රිකට් සභාවේ මීළඟ සභාපතිවරයා වීමේ අපේක්‍ෂාවෙන් සිටින බවත් දැනගන්නට ඇති නමුත් ඔහු ඒ සම්බන්ධයෙන් කිසිවක් නිල වශයෙන් ප්‍රකාශයට පත්කර නැහැ. ජේ ෂා මහතා දැනට ආසියානු ක්‍රිකට් සභාවේ සභාපතිවරයායි.
ශූරයන්ගේ කුසලාන තරගාවලිය 2025 පෙබරවාරි 19 වැනිදා සිට මාර්තු මස 9 වැනිදා දක්වා පැවැත්වෙන අතර දැනට සූදානම් කර ඇති තරග කාලසටහන අනුව ඉන්දීය කණ්ඩායමේ සියලුම තරග ලාහෝරයේදී පැවැත්වීමට නියමිතයි.
