විදේශ විනිමය සංරක්ෂණය කිරීමේ අරමුණින් වාහන ආනයනය සීමා කිරීමට හෝ කප්පාදු කිරීමට රජයට ක්ෂණික සැලසුමක් නොමැති බව ශ්රී ලංකා මහ බැංකු අධිපති නන්දලාල් වීරසිංහ මහතා අද (25) ප්රකාශ කළේය.
මහ බැංකු පරිශ්රයේ පැවැති මාධ්ය හමුවකදී අදහස් දක්වමින් ඔහු සඳහන් කළේ, රටේ විදේශීය මූල්ය තත්ත්වය මේ වනවිට ස්ථාවර මට්ටමක පවතින බවයි.
දැනට ශ්රී ලංකාවේ විදේශ සංචිත ප්රමාණය ඇමරිකානු ඩොලර් බිලියන 7 ඉක්මවා ඇති බවත්, විදේශ ප්රේෂණවල අඩුවීමක් පිළිබඳව ද මේ වනවිට පැහැදිලි සලකුණු නොපෙනෙන බවත් ඔහු පැවසීය.
එමෙන්ම මැදපෙරදිග රටවල සේවය කරන ශ්රී ලාංකික ශ්රමිකයින් විශාල පිරිසක් සේවයෙන් ඉවත් කරන බවට තොරතුරු නොමැති බවද මහ බැංකු අධිපතිවරයා සඳහන් කළේය.
මෑත කාලයේ සංචාරකයින්ගේ පැමිණීමේ යම් අඩුවීමක් පෙනී ගියද, එය දැඩි අවධානයක් යොමු කළ යුතු තත්ත්වයක් නොවන බවත්, ඒ පිළිබඳව බලධාරීන් සමීපව නිරීක්ෂණය කරමින් සිටින බවත් ඔහු වැඩිදුරටත් කියා සිටියේය.
මෙම පසුබිම තුළ දැනට රට තුළට ගෙන එනු ලබන වාහන හෝ අනෙකුත් අත්යවශ්ය භාණ්ඩ ආනයනය සීමා කිරීමේ අවශ්යතාවයක් නොමැති බවද ශ්රී ලංකා මහ බැංකුව අවධාරණය කරයි.
