UNICEF සංවිධානයේ මූල්‍ය සහාය යටතේ, Ministry of Health and Mass Media හි සම්බන්ධීකරණය සහ මඟපෙන්වීම මත කෑගල්ල දිස්ත්‍රික්කයේ මහ රෝහල් පරිශ්‍රයේ ප්‍රථම වරට ස්ථාපිත කළ අති නවීන ආසාදිත අපද්‍රව්‍ය දහන යන්ත්‍රය (Incinerator) පසුගියදා සේවාවට එක් කරන ලදී. මෙම අවස්ථාවට ප්‍රධානත්වය දැරුවේ සෞඛ්‍ය නියෝජ්‍ය අමාත්‍ය හසංක විජේමුනි මහතාය.
මෙම නවීන දහන යන්ත්‍රය ස්ථාපනය කිරීම සඳහා UNICEF විසින් රුපියල් මිලියන 17කට අධික මුදලක් වැය කර තිබේ. නව යන්ත්‍රය මගින් දිනකට සායනික අපද්‍රව්‍ය කිලෝග්‍රෑම් 1000කට වැඩි ප්‍රමාණයක් දහනය කිරීමේ හැකියාව ඇති බව සඳහන් වේ.
දෛනිකව රෝහලෙන් ආසාදිත අපද්‍රව්‍ය කිලෝග්‍රෑම් 300කට ආසන්න ප්‍රමාණයක් ඉවත් කිරීමට සිදුවන අතර මෙතෙක් එම අපද්‍රව්‍ය දහනය කිරීම සිදුකර තිබුණේ Central Environmental Authority හි බලපත්‍ර ලැබූ සායනික අපද්‍රව්‍ය කළමනාකරණ සමාගමක් හරහාය. නව දහන යන්ත්‍රය ස්ථාපනය කිරීමත් සමඟ එම සමාගමට ගෙවීමට සිදුවූ වියදමද රෝහලට ඉතිරි වනු ඇත.
කෑගල්ල දිස්ත්‍රික්කයේ මහ රෝහල සඳහා මෙවැනි ආසාදිත අපද්‍රව්‍ය දහන යන්ත්‍රයක් අවශ්‍ය බව රෝහල් පාලනාධිකාරිය විසින් පසුගිය රජයන්ට වරින්වර දැනුම් දී තිබුණද එම ඉල්ලීම එදා ඉටු නොවූ බවද මෙහිදී අනාවරණය විය.
1960 වසරේ ආරම්භ කරන ලද මෙම රෝහල අදියරෙන් අදියර සංවර්ධනය වෙමින් මේ වන විට ඇඳන් 815ක ධාරිතාවයකින් යුක්තය. කෑගල්ල දිස්ත්‍රික්කයේ හි ප්‍රධාන රෝහල වන මෙය ලක්ෂ 9කට ආසන්න ජනතාවකට ප්‍රතිකාර සපයන අතර නුවර, කුරුණෑගල , රත්නපුර දිස්ත්‍රික්ක සහ අවට ප්‍රදේශවල ජනතාවද මෙහි සෞඛ්‍ය සේවාවන් ලබාගනී.
මෙම අවස්ථාවට සමන්ත රණසිංහ මහතා, නිමල් කරුණාරත්න මහතා ඇතුළු සෞඛ්‍ය හා ජනමාධ්‍ය අමාත්‍යාංශයේ උසස් නිලධාරීන්, වෛද්‍යවරුන්, හෙද නිලධාරීන් සහ රෝහල් කාර්ය මණ්ඩලය නියෝජනය කරමින් පිරිසක් එක්ව සිටියහ.