සෝමාලියාවෙන් වෙන්වී ගිය ‘සෝමාලිලන්ත’ (Somaliland) කලාපය ස්වාධීන රාජ්‍යයක් ලෙස ඊශ්‍රායලය විසින් පිළිගැනීමට එරෙහිව සෝමාලියානු රජය සිය රාජ්‍යතාන්ත්‍රික සහ හමුදාමය බලය ශක්තිමත් කිරීම ආරම්භ කර තිබේ.

මෙහි තීරණාත්මක පියවරක් ලෙස සෝමාලියාව සහ සෞදි අරාබිය අතර නව “හමුදා සහයෝගීතා” ගිවිසුමක් පසුගිය සඳුදා රියාද් නුවරදී අත්සන් කෙරිණි.

සෝමාලියානු ආරක්ෂක අමාත්‍ය අහමඩ් මෝලිම් ෆිකී සහ සෞදි ආරක්ෂක අමාත්‍ය කාලිඩ් බින් සල්මාන් කුමරු විසින් මෙම අවබෝධතා ගිවිසුමට අත්සන් තබන ලදී.

මීට සති කිහිපයකට පෙර සෝමාලියාව කටාර් රාජ්‍යය සමඟද මෙවැනිම ආරක්ෂක ගිවිසුමකට එළඹ තිබීම විශේෂත්වයකි.

පසුගිය දෙසැම්බර් මාසයේදී ඊශ්‍රායලය විසින් ‘සෝමාලිලන්තය’ පිළිගැනීමත් සමඟ අප්‍රිකානු අං (Horn of Africa) කලාපයේ දැඩි නොසන්සුන්තාවක් හටගත්තේය.

ඒ අනුව සෝමාලිලන්තයේ ඊශ්‍රායල හමුදා කඳවුරක් ඉදිකිරීමට සූදානමක් පවතින බවට සෝමාලියාව චෝදනා කරයි.

“අපේ රටේ භූමියක ඊශ්‍රායල කඳවුරු ඉදිකිරීමට අපි කිසිසේත් ඉඩ දෙන්නේ නැහැ. ඕනෑම විදේශීය ආක්‍රමණයකට එරෙහිව අපි සටන් කරනවා,” යැයි සෝමාලියානු ජනාධිපති හසන් ෂෙයික් මොහොමඩ් අවධාරණය කර ඇත.

ඊශ්‍රායලයේ මෙම ක්‍රියාවලියට එක්සත් අරාබි එමීර් රාජ්‍යය (UAE) සහාය දක්වන බවට එල්ල වන වාර්තා හමුවේ, එම රට සමඟ පැවති සියලුම ආරක්ෂක සහ වෙළඳ ගිවිසුම් අවලංගු කිරීමට සෝමාලියාව පසුගිය මාසයේදී පියවර ගත්තේය.

සෝමාලියාවේ ජාතික සමගියට හානි වන පරිදි එමීර් රාජ්‍යය කටයුතු කරන බවට මින් චෝදනා කෙරේ.

සෝමාලියාව සෞදි අරාබිය සහ කටාර් දෙසට නැඹුරු වීම, සෞදි අරාබිය සහ එක්සත් අරාබි එමීර් රාජ්‍යය අතර පවතින රාජ්‍යතාන්ත්‍රික මතභේද තවත් තීව්‍ර කර තිබේ.

අප්‍රිකානු කලාපයේ ආරක්ෂාව සහ ඊශ්‍රායලයේ බලපෑම පාලනය කිරීම සඳහා සෝමාලියාව ගෙන යන මෙම වැඩපිළිවෙළ ජාත්‍යන්තර දේශපාලනයේ දැඩි කතාබහට ලක්ව තිබේ.