වොෂින්ටන් – ඇමෙරිකානු ජනාධිපති ඩොනල්ඩ් ට්රම්ප් සහ ඉරානය අතර පවතින රාජ්යතාන්ත්රික සබඳතා තීරණාත්මක මාවතකට අවතීර්ණ වී ඇති පසුබිමක, ඊශ්රායල අග්රාමාත්ය බෙන්ජමින් නෙතන්යාහු විශේෂ සංචාරයක් සඳහා අමෙරිකාව බලා පිටත්ව යාමට සූදානම් වෙයි.
ඕමානයේ පැවති මූලික සාකච්ඡාවලින් අනතුරුව ඇමෙරිකාව සහ ඉරානය අතර ඉදිරි සාකච්ඡා පැවැත්වීමට ජනාධිපති ට්රම්ප් ගත් තීරණය පිළිබඳව මෙහිදී නෙතන්යාහුගේ දැඩි අවධානය යොමුවනු ඇතැයි වාර්තා වේ.
ඊශ්රායල අග්රාමාත්ය කාර්යාලය නිවේදනය කරන පරිදි, ඉරානයේ න්යෂ්ටික වැඩසටහනට පමණක් සීමා නොවී, එරට සතු බැලස්ටික් මිසයිල පද්ධතිය සීමා කිරීම සහ හමාස්, හෙස්බොල්ලා වැනි කලාපීය සන්නද්ධ කණ්ඩායම්වලට ඉරානය ලබාදෙන සහය අත්හිටුවීමට ට්රම්ප් පරිපාලනය බලපෑම් කළ යුතු බව නෙතන්යාහුගේ ස්ථාවරය වී ඇත.
මෙය ඩොනල්ඩ් ට්රම්ප් යළිත් බලයට පත්වීමෙන් පසු නෙතන්යාහු සමඟ පවත්වන 7 වන නිල හමුව වීම විශේෂත්වයකි.
කෙසේ වෙතත්, ඉරාන විදේශ අමාත්ය අබ්බාස් අරග්චි ප්රකාශ කර ඇත්තේ මිසයිල වැඩසටහන පිළිබඳව කිසිදු සාකච්ඡාවකට ඉරානය සූදානම් නොමැති බවයි.
ඉරාන ජනාධිපති මසූඩ් පෙසෙෂ්කියන් සඳහන් කර ඇත්තේ ඉරානය සාකච්ඡා මාර්ගයෙන් ගැටලු විසඳා ගැනීමට කැමති වුවද, බලහත්කාරී බලපෑම් හමුවේ හිස නොනමන බවයි.
“ඉරාන ජාතිය සැමවිටම ගෞරවයට ප්රතිචාර දක්වන්නේ ගෞරවයෙන්. නමුත් බලහත්කාරී භාෂාවට අප යටත් වන්නේ නැහැ,” යනුවෙන් ජනාධිපති පෙසෙෂ්කියන් X පණිවිඩයක් නිකුත් කරමින් පවසා ඇත.
ඕමානයේ පැවති වටය ඉතා සාර්ථක බවත්, ඉරානය යම් එකඟතාවයකට පැමිණීමට දැඩි උනන්දුවක් දක්වන බවත් ට්රම්ප් පවසා තිබේ.
එසේ වුවද, “එකඟතාවයකට නොපැමිණෙන්නේ නම් එහි ප්රතිවිපාක ඉතා දරුණු වනු ඇති” බවටද ඔහු අනතුරු අඟවා ඇත.
විදේශ ප්රතිපත්ති විශ්ලේෂකයින් පවසන්නේ, ඇමෙරිකාව ඊශ්රායලයේ ‘අන්තවාදී’ ඉල්ලීම් ඉටු කිරීමට උත්සාහ කළහොත් මෙම සාකච්ඡා බිඳ වැටීමේ අවදානමක් පවතින බවයි.
දැනටමත් අමෙරිකාව මැදපෙරදිග කලාපයට යුද නැව් සහ ගුවන් යානා ප්රවාහන නෞකා යොමු කරමින් යුදමය පීඩනයක්ද ගොඩනගා තිබේ.
