ජීවිතේ ලස්සනයි හි පන්සිළු විදියට අසීමිත ප්රේක්ෂක ආදරේ දිනාගත් සම්පත් ශ්රී රෝෂන් මේ වෙද්දි අපට පුංචි තිරෙන් දකින්න ලැබෙන්නේ නැහැ. ‘ජුලියා’ සිනමාපටය හරහා සිනමා අධ්යක්ෂණයට පිවිසි සම්පත් මේ වන විට සිය දෙවැනි සිනමා නිර්මාණය වන ‘එමලි’ හි වැඩ අවසන් කර තිබෙනවා. ඒ එක්කම සම්පත් ශ්රී රෝෂන් විසින් අධ්යක්ෂණය කරනු ලබන නවතම සිනමා නිර්මාණය වන ‘FIN’ (වරල්) හි මුහුරත් උලෙළ ද පසුගියදා පැවැත්වුණා. ඒ වෙනුවෙන් ලංකාවට පැමිණි සිටින අතරතුර අප ඔහු කෙටි පිළිසඳරකට එක්කර ගත්තා.
ජීවිතේ කොහොමද?
ජීවිතේ එදා ඉඳන්ම කලාව එක්කයි ගතවෙන්නේ. ඒ නිසා කොහේ ගියත් ඉන් මිදිලා ඉන්න අමාරුයි. නිතරම නාට්ය, චිත්රපට නොකෙරුණත් ඒ සුන්දරත්වය එක්කම තමයි ජීවිතේ ගත වෙන්නේ.
අන්තිමට කරපු ටෙලි නාට්යය මොකක්ද?
සිරස නාලිකාවේ විකාශය වුණු ‘ආදරේ ගින්දරක්’ ටෙලි නාට්යය.
කලාවට ආව ගමනත් ලෙහෙසි පහසු නැහැ නේද?
මම ඉස්සර පාසල් යන කාලේ නුවර බෑන්ඩ් එකක බේස් ගිටාරිස් කෙනෙක්. ඊට පස්සේ මම කලාවට ඇවිත් සහාය අධ්යක්ෂවරයෙක් විදියට වැඩ කරලා, මීදියාවල වැඩ කරලා, රංගනයට ඇවිත් ඉන්පසු අධ්යක්ෂණයට ආව ලොකු ගමනක් තියෙන්නේ.
ප්රියන්ත දිසානායක හමුවීම ඔබේ ජීවිතේ වෙනස් කළේ කොහොමද?
නුවර බෑන්ඩ් එකේ කැසට් කවරයට ෆොටෝ ගන්න දවසේ මේකප් කරන්න ආවේ ප්රියන්ත. අපි ඉක්මනින්ම සුහද වුණා. ඔහු කිව්වා, ටෙලි නාට්ය, චිත්රපට කරනවා කියලා. ඒ වෙද්දීත් මම ස්ක්රිප්ට් ලියන්න පටන් අරන් තිබුණේ. මම ප්රියන්තගෙන් ඇහුවා කොහොමද ඔය ක්ෂේත්රයට එන්නේ කියලා. එයා මට කිව්වා, විෂය හැදෑරීමෙන් හෝ ක්ෂේත්රයේ වැඩ කරමින් පිරිස එක්ක ගැටුණොත් ඔයාට සෑහෙන දේවල් ටිකක් අල්ලගන්න පුළුවන් කියලා. මගේ වාසනාවට ප්රියන්ත මාව මැක්ලි ෆිල්ම් ආයතනයට යොමු කළා. එතැනින් මම සෑහෙන දේවල් ඉගෙන ගත්තා. මට ඒ මුල හදලා දුන්නේ ප්රියන්ත දිසානායක.
ඔබ දැන් ජීවත් වෙන්නේ කොහෙද?
2018දී මම ඔස්ට්රේලියාවට ගියා. දැන් මම ඉන්නේ මෙල්බර්න්වල. ඒ එක්කම මම විවාහ වුණා. ප්රමොදී මගේ බිරිය, එයත් එහෙ රැකියාවක් කරනවා. මමත් ව්යාපාරයක් කරනවා. දැන් අපිට දුවෙක් ඉන්නවා. පවුලක් විදිහට සාර්ථකව ජීවිතේ ගෙනියනවා.
පිටරට යන්න හිතුවේ ඇයි?
දවසක රටකට ගිහින් ජීවත් වෙන්න ඕනේ, අනාගතයේ දවසක මගේ දරුවන්ට ඒක හොඳ වෙයි කියන අදහස ඉස්සර ඉඳන් මගේ හිතේ තිබුණා. ලංකාවේ ජීවිතේට වඩා ආර්ථිකමය මට්ටමින් ස්ථාවර කර ගන්න සිතීමත් එක හේතුවක්.
ඔබ රට හැර යන්නේ නළුවෙක් විදියට ස්ථාවර වේගෙන එනකොටමයි. ඒ දේ දැනුණේ කොහොමද?
මම ලංකාවෙන් යන දවසට කලිනුත් රූගත කිරීමකට ඉඳලා ගියේ. එදා මම ෆ්ලයිට් එකේ යද්දී මට හිතුණා, මම මේ යන්නේ ආයේ කාලෙකින් එන්න නෙවෙයිනේ කියලා. ඒ හැඟීම ඇත්තටම දරාගන්න හරි අමාරු වුණා. එහෙ ගිහිල්ලත් මම මගේ යාළුවන්ට නිතරම කෝල් කළා. ඒ තරම් දරාගන්න අමාරු කාලයක් තිබුණා. ඊට පස්සේ මම මගේ ඊළඟ සිනමා නිර්මාණය වන ‘එමලි’ හි පිටපත ලියන්න ගත්තා. එතකොට අර මට තිබුණු කලාව අහිමි වීමේ කම්පනය ටිකෙන් ටික නැතිව ගියා.
එමලි ගැනත් අපි කතා කරමු?
එමලි සම්පුර්ණයෙන්ම රූගත කළේ ලංකාවේ. මේක ආදරයත් මුසු වුණු හොල්මන් කතාවක්. මේ වෙද්දී 75%ක් විතර වැඩ අවසන් වෙලා තියෙන්නේ. මේ මොහොතේ එහි පසු නිෂ්පාදන කටයුතු සිදු වෙමින් තියෙනවා. නදීෂා හේමමාලි, උමාලි තිලකරත්න, ටනාෂා, දේවා සහ අචල වල්පොල වැනි ශිල්පීන් රංගනයෙන් දායක වෙනවා.
ඔබ තුන්වැනි නිර්මාණයටත් මුල පිරුවා නේද?
ඔව්, එහි නම ‘වරල්’…වෙනස් වූ වැඩක්. මම කැමැතියි එකිනෙකට වෙනස් නිර්මාණ කරන්න.
ටෙලි නාට්ය කරන්න කැමැත්තක් නැද්ද?
රංගන ශිල්පියෙක් විදියට රඟපෑ ටෙලි නිර්මාණ රැසක් තිබුණා. ඒ වගේම ටෙලි නාට්ය 10ක් මම අධ්යක්ෂණය කළා. කොටස් 16ක ටෙලි නාට්යයක් ලියාගෙන ඉන්නවා. තාම ඒ වෙනුවෙන් කාලයක් හොයාගන්න බැරුව ඉන්නේ.
ඇත්ත ජීවිතේදී ඔබ මොන වගේ කෙනෙක්ද?
මම සතුටින් සැහැල්ලුවෙන් ඉන්න කැමැති කෙනෙක්. නමුත් මට අසාධාරණයක් කළොත් ඒකට එරෙහිව නැඟී ඉන්නවා, එහෙම නැත්නම් එක කනකින් අහලා අනිත් කනෙන් අයින් කරලා පාඩුවේ ඉන්නවා.
