වසර 13ක් තිස්සේ අතුරුදහන් බවට සැලකුණු එයාර්ඉන්දියා ගුවන් සේවයට අයත් බෝයිං මගී ගුවන් යානය හමුවී තිබේ.
ඒ කොල්කටා ගුවන්තොටුපළේ දුරස්ථ ස්ථානයක නවතා තිබියදීයි.
2012 වසරේදී කොල්කටා ගුවන් තොටුපළේදී අස්ථානගත වූ මෙම යානය පිළිබඳ තොරතුරු එයාර් ඉන්ඩියා වාර්තාවලින් සම්පූර්ණයෙන්ම ගිලිහී ගොස් තිබුණි.
මෙය අවුරුදු 43ක් පැරණි, ටොන් 30ක් බර සහ මීටර් 30ක් දිග බෝයිං 737-200 වර්ගයේ යානයක්.
යානය වසර 13ක් තිස්සේ ගුවන් තොටුපළේ නවතා තැබීම වෙනුවෙන් එයාර් ඉන්ඩියා සමාගමට ඉන්දියන් රුපියල් මිලියන 10ක දඩයක් ගෙවීමට සිදු විය.
කාර්ය මණ්ඩල වෙනස්වීම් සහ වාර්තා තැබීමේ දුර්වලතා හේතුවෙන් මෙම යානය පිළිබඳ දත්ත නිල ලේඛනවලින් මග හැරී තිබුණි.
මුලින් ඉන්දියන් එයාර්ලයින්ස් සතු වූ මෙය, පසුව ඉන්දියානු තැපැල් සේවයට බදු දී තිබූ අතර 2012 දී සේවයෙන් ඉවත් කර තිබේ.
මීට සති දෙකකට පෙර මෙම යානය පාර මාර්ගයෙන් බැංගලෝරය වෙත ප්රවාහනය කර තිබෙන බව සඳහන්.
එය දැන් ගුවන් කාර්ය මණ්ඩලයේ ගොඩබිම් පුහුණු කටයුතු සඳහා භාවිතා කිරීමට නියමිතයි.
පසුගිය වසර 5 තුළ කොල්කටා ගුවන් තොටුපළෙන් ඉවත් කරන ලද 14 වැනි අතහැර දැමූ යානය මෙයයි.
තවත් ATR-72 වර්ගයේ අයිතිකරුවන් නොමැති යානා දෙකක් (2) වසර 5ක පමණ සිට එම ගුවන් තොටුපළේම පවතියි.
