ලොව පුරා සිටින සුරතල් පූසන්ගෙන් අඩකට වැඩි ප්රමාණයක් බර වැඩි බවට සත්ව විශේෂඥයන් හෙළිකරයි.
මේ තරබාරු පූසන් සඳහා දැන් ඔසෙම්පික් (Ozempic) ඖෂධයේ පූසන් වෙනුවෙන්ම සැකසූ අනුවාදයක් හඳුන්වා දී ඇති බවයි විදෙස් වාර්තා පෙන්වා දෙන්නේ.
සුරතල් සතුන් සඳහා ඖෂධ සපයන සමාගමක්, මෙම ඖෂධය පිළිබඳව කළ පළමු සායනික පරීක්ෂණය වන MEOW-1 (ManagEment of OverWeight cats with OKV-119) සාර්ථක වූ බව නිවේදනය කළේය.
මෙම ඖෂධය, බළලුන්ගේ ජීවන තත්ත්වය ඉහළ නැංවීමට, සෞඛ්ය සම්පන්න වයස්ගත වීම ප්රවර්ධනය කිරීමට සහ පූසන් සඳහා ලබා ගත හැකි වඩාත්ම බලපෑමක් ඇති කරන ආයු කාලය දීර්ඝ කිරීමේ ප්රතිකාරය වීමට පවා හැකියාව ඇති බවයි පැවසෙන්නේ.
OKV-119 ලෙස හැඳින්වෙන මෙම ඖෂධය, බර අඩු කිරීමට අමතරව දියවැඩියාව සහ වකුගඩු රෝග වැනි සුලභ පරිවෘත්තීය රෝග සඳහා ද විසඳුම් ලබා දීමට හැකියාව ඇති අතර, එමඟින් දීර්ඝායුෂට සහ සෞඛ්ය සම්පන්න වයස්ගත වීමට උපකාරී වෙන බව සඳහන්.
ඖෂධ සමාගමේ ප්රධාන විධායක නිලධාරී (CEO) මයිකල් ක්ලොට්ස්මන් සඳහන් කළේ, මෙම ඖෂධය සැලසුම් කර ඇත්තේ, ආහාර ගැනීමේ පුරුදුවල සැලකිය යුතු වෙනස්කම් අවශ්ය නොවී, වැඩිදියුණු කළ ඉන්සියුලින් සංවේදීතාව, අඩු මේද ප්රමාණය සහ වඩා කාර්යක්ෂම බලශක්ති පරිවෘත්තීය වැනි නිරාහාරව සිටීමේ කායික බලපෑම් බොහොමයක් අනුකරණය කිරීමට බවයි.
MEOW-1 පරීක්ෂණය සාර්ථක වුවහොත්, අදාළ ඖෂධ සමාගම විශාල පරීක්ෂණයක් දියත් කිරීමට සහ ඉක්මනින්ම අමෙරිකාවේ ආහාර හා ඖෂධ පාලන අධිකාරියෙන් (FDA) අනුමැතිය ඉල්ලා සිටීමට සැලසුම් කරයි.
මෙම ඖෂධය 2028 හෝ 2029 තරම් ඉක්මනින් ලබා දීමට සමාගම බලාපොරොත්තු වෙයි.
