ගාසා තීරයට “ජාත්යන්තර හමුදා බලකායක්” යෙදවීම පිළිබඳව අමෙරිකාව ඉදිරිපත් කළ යෝජනාවට, එක්සත් ජාතීන්ගේ ආරක්ෂක කවුන්සිලයේ අනුමැතිය හිමිවී තිබේ.
ශ්රී ලංකා වේලාවෙන් අද (18) අලුයම 03.30ට පමණ කවුන්සිල සාමාජිකයින් ඒ වෙනුවෙන් ඔවුන්ගේ ඡන්දය භාවිත කරන ලදි.
සාමාජිකයින් 15 දෙනෙකුගෙන් යුත් ආරක්ෂා කවුන්සිලයේ සාමාජිකයින් 13 දෙනෙකු යෝජනාවට පක්ෂව ඡන්දය භාවිත කර තිබේ.
රුසියාව සහ චීනය ඡන්දය දීමෙන් වැළකී සිටි බව විදෙස් වාර්තා වල සඳහන් වේ.
ඒ අනුව, ගාසා තීරයේ “I.S.F” හෙවත් ජාත්යන්තර ස්ථායිකරණ බලකායක් ස්ථාපනය කිරීමට නියමිත වේ.
මේ වන විටත් රටවල් ගණනාවක් ඒ වෙනුවෙන් සිය හමුදා සාමාජිකයින් යෙදවීමට කැමැත්ත පළ කර ඇති බව පසුගියදා අමෙරිකානු ජනාධිපති ඩොනල්ඩ් ට්රම්ප් සඳහන් කළේ ය.
ගාසා තීරයේ අන්තර්වාර පාලන අධිකාරියක් පිහිටුවීම සාම සැලැස්මේ තවත් කරුණක් වේ.
ගාසා තීරයේ ප්රතිසංස්කරණය සහ ආර්ථික ප්රකෘතිය අධීක්ෂණය කිරීම එම පාලන අධිකාරියේ අරමුණ බව විදෙස් වාර්තා වල සඳහන් ය.
පසුගිය සැප්තැම්බර් මාසයේදී ඩොනල්ඩ් ට්රම්ප් පරිපාලනයේ මැදිහත්වීමෙන්, ඊශ්රායලය සහ හමාස් සංවිධානයට කරුණු 20ක සාම සැලැස්මක් ඉදිරිපත් කෙරුණි.
දෙපාර්ශවය ඊට මුලින් ප්රතිරෝධයක් දැක්වුවද, පසුව ඔක්තෝබර් මාසයේදී ඊට එකඟ වුණි.
හමාස් සංවිධානය ගාසා තීරයේ රඳවාගෙන සිටි ප්රාණ ඇපකරුවන් සහ අනෙක් ප්රාණ ඇපකරුවන්ගේ මල සිරුරු ඊශ්රායලයට භාර දීම ඇරඹුණේ ඉන් අනතුරුවය.
ඊශ්රායලයද, ඔවුන් භාරයේ සිටි පලස්තීන සිරකරුවන් සිය ගණනක් නිදහස් කිරීමට කටයුතු කරන ලදි.
සටන් විරාමයක් පැවතියද, ගාසා තීරයේ දේශ සීමා ඇතුළු ගැටළු ගණනාවක් හේතුවෙන්, ඊශ්රායලය සහ හමාස් සංවිධානය අතර තවදුරටත් ගැටුම් පවතින බව විදෙස් වාර්තා පෙන්වා දෙනු ලබයි.
සාම සැලැස්ම සාර්ථක වීමට නම්, හමාස් සංවිධානය ආයුධ බිම තැබීමට එකඟ විය යුතු අතර, ඊශ්රායලය පලස්තීනයේ ස්වාධීනත්වය පිළිගත යුතුය.
