පවුලේ සාමාජිකයින්ගේ අනුදැනුමකින් හෝ කැමැත්තකින් තොරව මරණ පරීක්ෂණවලින් පසු ශරීර කොටස් රඳවා තබා ගැනීමේ අතීත පිළිවෙත සම්බන්ධයෙන් සමාව අයැද සිටින බව ටස්මේනියානු රජය පවසයි.
පසුගිය වසරේ අප්රේල් මාසයේදී, රාජ්ය මරණ පරීක්ෂක කාර්යාලය නිවේදනය කළේ, 1966 සිට 1991 දක්වා කාලය තුළ, මරණ පරීක්ෂණවලින් ලබාගත් නිදර්ශක පවුල් දැනුවත් කිරීමකින් තොරව හෙබාර්ට්හි ටස්මේනියා විශ්වවිද්යාලයේ R.A. Rodda Pathology Museum හි තබා තිබේද යන්න විමර්ශනය කරන බවයි.
පසුගිය සැප්තැම්බර් මාසයේදී, මරණ පරීක්ෂක සයිමන් කූපර් විසින් කෞතුකාගාරයේ තබා ඇති මිනිස් නිදර්ශක 177ක් පිළිබඳ ඔහුගේ විමර්ශනයේ සොයාගැනීම් භාර දී තිබේ.
ඉන් හෙළි වී ඇත්තේ එම කාලය තුළ ටස්මේනියාවේ සේවය කළ ව්යාධි විද්යාඥයින් විසින් පවුල්වල අනුමැතියකින් තොරව හෝ නිදර්ශක ලබා ගැනීමේදී මළ සිරුරු සඳහා වගකිව යුතු මරණ පරීක්ෂකවරුන්ගේ කැමැත්තෙන් තොරව කෞතුකාගාරයකට ලබා දීම සඳහා කිරීටක මරණ පරීක්ෂණවලින් ලබාගත් ශරීර කොටස් ලබාගෙන ඇති බවයි.
බලපෑමට ලක් වූවන් සමඟ සාකච්ඡා කර ඒ වෙනුවෙන් නිසි ආකාරයේ නිල සමාවක් අයැදීමට රජය අදහස් කරන බවයි ඊයේ පාර්ලිමේන්තුවේදී, නීතිපති ගයි බාර්නට් තහවුරු කළේ.
සමාව අයැදීම සඳහා දිනයක් තවමත් නියම කර නොමැති අතර අදාළ දෙපාර්තමේන්තු තුළ වැඩිදුර විමර්ශන කටයුතු සිදු කිරීම සඳහා පියවර ගෙන ඇති බව ද ඔහු පාර්ලිමේන්තුවට පවසා තිබේ.
අදාළ විමර්ශන වාර්තාව මහජන නඩු පවරන අධ්යක්ෂ (DPP) සහ ටස්මේනියා පොලීසිය වෙත යොමු කර ඇති අතර, 1950 සිට 1990 දක්වා අදාළ සේවකයින්ගේ නම් සහ කටයුතු පිළිබඳව වැඩිදුර පරීක්ෂණ සිදු කරන බවයි නීතිපතිවරයා සඳහන් කර ඇත්තේ.
