ප්‍රධාන පෙළේ සංගීත කාර්ය සාධන හිමිකම් සංවිධාන (PROs) වන ASCAP, BMI සහ SOCAN විසින්, කෘත්‍රිම බුද්ධිය (AI) භාවිතයෙන් නිර්මාණය කරන ලද සංගීත කෘති සම්බන්ධයෙන් සිය ප්‍රතිපත්ති යාවත්කාලීන කරමින් ඒකාබද්ධ නිවේදනයක් නිකුත් කර තිබේ.

මෙම නව නීති මාලාවට අනුව, කෘත්‍රිම බුද්ධියේ සහාය ඇතිව, එනම් ‘පාර්ශ්විකව’ AI මගින් උත්පාදනය කරන ලද සංගීත නිර්මාණ සඳහා පවා, කාර්ය සාධන කර්තෘභාග (performance royalties) එකතු කිරීම සඳහා ලියාපදිංචි වීමට නිර්මාණකරුවන්ට අවස්ථාව සලසා ඇත.

මෙම ආයතන තුනම අවධාරණය කරන්නේ, AI ආකෘති පුහුණු කිරීම සඳහා, සංගීත නිර්මාණකරුවන්ගෙන් කිසිදු අවසරයකින්, ගෙවීමකින් හෝ ඔවුන්ට ගෞරවයක් (credit) ලබා දීමකින් තොරව, ප්‍රකාශන හිමිකම් සහිත සංගීත කෘති යොදා ගැනීම කිසිසේත්ම ‘සාධාරණ භාවිතයක්’ (fair use) ලෙස නොසලකන බවයි. ඒ වෙනුවට, ඔවුන් මෙම ක්‍රියාවලිය සෘජුවම ‘සොරකමක්’ (theft) ලෙස දැඩිව හඳුන්වා දී ඇත.

මෙම ස්ථාවරය තවදුරටත් තහවුරු කරමින්, ASCAP, BMI සහ SOCAN ආයතන, ප්‍රකාශන හිමිකම් නීති දැඩි ලෙස බලාත්මක කිරීම සඳහා වන රාජ්‍ය ව්‍යවස්ථා සම්පාදන ක්‍රියාවලීන්ට මෙන්ම, Suno සහ Udio වැනි AI සමාගම්වලට එරෙහිව ගෝලීයව ගොනු කර ඇති නඩු සඳහා ද සිය පූර්ණ සහයෝගය පළ කරන බව දන්වා සිටී.

නව ප්‍රතිපත්ති මාලාව, එක්සත් ජනපද ප්‍රකාශන හිමිකම් කාර්යාලයේ (US Copyright Office) මාර්ගෝපදේශවලට බොහෝ දුරට අනුකූල වන සේ සකස් කර තිබේ. ඒ අනුව, 100% ක් මනුෂ්‍ය නිර්මාණ හෝ, ගීත මාතෘකා, පද රචනා අදහස් ලබා ගැනීම හෝ සංගීත මාස්ටරින් (mastering) කිරීම වැනි සුළු සහායක කාර්යයන් සඳහා පමණක් AI භාවිතා කළ (AI-assisted) නිර්මාණ සඳහා, කර්තෘභාග මුදල් ලබා ගැනීමට පූර්ණ හිමිකම ලැබේ.

මීට අමතරව, නිර්මාණයේ එක් කොටසක් (උදාහරණයක් ලෙස, ගීතයක එක් පදයක් හෝ සංගීත භාණ්ඩ වාදනය) AI මගින් ජනනය කර, ඉතිරිය මනුෂ්‍යයෙකු විසින් නිර්මාණය කර ඇත්නම් (partially AI-generated), එම නිර්මාණ ද ලියාපදිංචි කිරීමට අවසර හිමි වේ.

කෙසේ වෙතත්, නිර්මාණකරු විසින් හුදෙක් ‘ප්‍රොම්ප්ට්’ (prompt) පමණක් ලබා දී, සම්පූර්ණයෙන්ම AI මගින් උත්පාදනය කරන ලද සංගීත කෘති, කර්තෘභාග සඳහා ලියාපදිංචි කිරීම හෝ එමගින් මුදල් ඉපැයීම සම්පූර්ණයෙන්ම තහනම් කර ඇත.

මෙම සංවිධාන අවධාරණය කරන්නේ, නුදුරු අනාගතයේදීම නිර්මාණකරුවන් විසින් තම නිර්මාණය ලියාපදිංචි කිරීමේදී, කෘත්‍රිම බුද්ධිය කුමන මට්ටමකින් සහ කෙසේ භාවිතා කළේද යන්න පැහැදිලිව හෙළිදරව් (disclose) කිරීම අනිවාර්ය වන බවයි.

එසේ AI මගින් ජනනය කළ කොටස් පිළිබඳ තොරතුරු වසන් කිරීම, අනාගතයේදී එම නිර්මාණයේ ප්‍රකාශන හිමිකම් ලියාපදිංචිය අවලංගු කිරීමට පවා හේතු විය හැකි බවට අනතුරු අඟවා ඇත.

BMI ආයතනය වැඩිදුරටත් පෙන්වා දෙන්නේ, ප්‍රකාශන හිමිකම් නීතියට අනුව, කෘත්‍රිම බුද්ධි සමාගමක් හෝ AI මෙවලමක් කිසිවිටෙකත් නිර්මාණයක ‘කර්තෘ’ (author) ලෙස නම් කළ නොහැකි බවත්, එම හිමිකම සැමවිටම මනුෂ්‍ය නිර්මාණකරුවාට පමණක් හිමිවන බවත්ය.