සෞදි අරාබියේ 2034 FIFA ලෝක කුසලානය සඳහා ගොඩනැගිල්ලක් මත පාපන්දු ක්රීඩාංගණයක් ඉදිකරන බවට සමාජ මාධ්ය ඔස්සේ සංසරණය වූ වීඩියෝ දර්ශන නිල නොවන බවත්, කෘත්රිම බුද්ධිය (AI) මඟින් නිර්මාණය කරන ලද බවත් තහවුරු වී තිබේ.
මේ පිළිබඳ පළවී ඇති ESPN වාර්තාවකට අනුව මෙම තොරතුරු හෙළිදරව් වේ.
ඒ අනුව මෙය විද්යා ප්රබන්ධයක් සේ පෙනුන ද, සැබෑ සැලැස්ම ද ඇත්තෙන්ම විශ්මයජනක බවයි සෞදි බලධාරීන් පෙන්වා දී ඇත්තේ.
සෞදි අරාබියේ නිල ලෝක කුසලාන ලංසු ලේඛනයට අනුව, මෙම ක්රීඩාංගණය මීටර 350ක් උසින් ඉදිකිරීමට සැලසුම් කර ඇති බව සඳහන්.
එහෙත් එය වෛරල් වීඩියෝවල දැක්වෙන පරිදි වෙනම ගොඩනැගිල්ලක් මුදුනේ අනතුරුදායක ලෙස නිරාවරණය නොවනු ඇති.
ඒ වෙනුවට, මෙම ක්රීඩාංගණය ‘ද ලයින්’ (The Line) නමැති සිරස් මෙගා-නගර ව්යාපෘතියේ ඝන, ස්ථර පහකින් යුත් ව්යූහය තුළට ඒකාබද්ධ වනු ඇති බව සඳහන්.
තාක්ෂණික වශයෙන් ගත් කල එය ‘ද ලයින්’ හි හතරවන සහ පස්වන මට්ටම් අත්පත් කර ගනු ඇති.
මෙය 2034 ලෝක කුසලානයට පෙර, 2027 දී වැඩ ආරම්භ කර 2032 දී නිම කිරීමට නියමිත අතර, සම්පූර්ණයෙන්ම පුනර්ජනනීය බලශක්තියෙන් ක්රියාත්මක කිරීමට නියමිතයි.
මේ අනුව ESPN වාර්තාව සඳහන් කරන්නේ සමාජ මාධ්ය හරහා පැතිර ගිය AI දර්ශන හේතුවෙන් ඇති වූ අදහස වැරදි වුව ද, NEOM ක්රීඩාංගණය නිසැකවම ලෝකයේ වඩාත්ම අද්විතීය සහ තාක්ෂණික වශයෙන් අභියෝගාත්මක ක්රීඩාංගණයක් වනු ඇති බවයි.
