ශ්‍රී ලංකාව හා එංගලන්තය අතර මේ මස 21වැනිදා ආරම්භ වන තරග 3කින් යුත් ටෙස්ට් ක්‍රිකට් තරගාවලියේ පළමු තරගයට ක්‍රීඩාකරන එංගලන්ත සංචිතය ඊයේ (19) පස්වරුවේ නිවේදනය කළා.

ඒ අනුව ආබාධයකට ලක්ව සිටින නිත්‍ය ටෙස්ට් නායක බෙන් ස්ටෝක්ස්ගේ ස්ථානයට යොවුන් තුන්ඉරියව් ක්‍රීඩකයෙකු වන මැතිව් පොට්ස් කැඳවා තිබෙනවා.

මේ වනවිට 25 වියේ පසුවන පොට්ස් මීට පෙරද එංගලන්තය නියෝජනය කළ ක්‍රීඩකයෙකු වුවත්, 2023 වසරේ ජනවාරි මස අයර්ලන්තයට එරෙහි ටෙස්ට් තරගය ක්‍රීඩා කිරීමෙන් පසු මේ දක්වා ටෙස්ට් කණ්ඩායමේ අවස්ථාවක් ලැබී නැහැ.

2022 වසරේදී නවසීලන්තයට එරෙහිව ජාත්‍යන්තර ටෙස්ට් වරම් දිනාගත් පොට්ස්, තරග 06කට ක්‍රීඩාකර කඩුලු 23ක් බිඳහෙළා සිටිනවා.

ඔහු සිය මංගල ටෙස්ට් තරගයේදීම ලකුණු 13කට කඩුලු 04ක් දවාගැනීමට සමත්වුණා.

පළමු පෙළ ක්‍රිකට් තරගයන්හි කැපී පෙනෙන ක්‍රීඩකයෙකු වන පොට්ස්, තරග 55කදී කඩුලු 218ක් බිඳහෙළා තිබෙනවා.

අවස්ථා 09කදී කඩුලු පහ බැගින් බිඳහෙළා ඇති ඔහුගේ ඉනිමක හොඳම පන්දු යැවීම 7/40ක් ලෙසියි දැක්වෙන්නේ.

එමෙන්ම පන්දුවට පහරදීමෙන්ද ලකුණු 1067ක් රැස්කර ඇති ඔහු ශතකයක් (නොදැවී 149) හා අර්ධ ශතක 03කට හිමිකම් කියනවා.

ආබාධයකට ලක්ව සිටින බෙන් ස්ටොක්ස්ට පළමු ටෙස්ට් තරගය අහිමිවන අතර, ඒ හේතුවෙන් එංගලන්ත වැඩබලන ටෙස්ට් නායකයා ලෙස ඔලී පෝප් කටයුතු කරනවා.

එමෙන්ම උපනායකත්වය සඳහා හැරී බෘෘක් නම්කර තිබෙනවා.

ඒ අනුව එංගලන්ත සංචිතය පහත පරිදි වනවා…

1 ඩෑන් ලෝරන්ස් 2 බෙන් ඩකට්, 3 ඔලී පෝප් (නායක), 4 ජෝ රූට්, 5 හැරී බෲක්, 6 ජේමි ස්මිත් (කඩුලු රකින්නා), 7 ක්‍රිස් වෝක්ස්, 8 ගස් ඇට්කින්සන්, 9 මැතිව් පොට්ස්, 10 මාර්ක් වුඩ්, 11 ෂොයිබ් බෂීර්