ව්යාජ කෙටි පණිවුඩ, ව්යාජ රජයේ ගාස්තු, සොරකම් කරනු ලැබූ හැඳුනුම්පත් භාවිතයෙන් සහ ලොව පුරා අන්තර්ජාල ගෙවීම් තාක්ෂණය තුළින් මහා පරිමාණයේ මූල්ය වංචාවක් සිදු කරමින් චීන අපරාධ කණ්ඩායම් පසුගිය වසර 3ක් ඇතුළත ඩොලර් බිලියනයකට වැඩි මුදලක් උපයාගෙන තිබෙන බව එරට අභ්යන්තර ආරක්ෂක දෙපාර්තමේන්තුව ප්රකාශ කළ බව බ්රිතාන්යයේ ඉන්ඩිපෙන්ඩන්ට් පුවත් සේවය වාර්තා කරනවා.
රජයේ ගාස්තු හෝ දඩ මුදල් ගෙවීම් සම්බන්ධව නිරන්තරයෙන්ම අනතුරු ඇඟවීමේ කෙටි පණිවුඩ ලැබෙන අමෙරිකානු ජාතිකයන් නිරීක්ෂණය කර ඔවුන්ගෙන් එම මුදල් ලබාගැනීම සඳහා අමෙරිකාව පුරා විවිධ පළාත්වල එම ජාවාරම චීනයේ සිට ක්රියාත්මක කර ඇති බවට හෙළි වී තිබෙන බවයි එම පුවත් සේවය පවසන්නේ.
එම මෙහෙයුම ක්රියාත්මක කිරීම සඳහා විවිධ පළාත්වල තැරැව්කරුවන් රඳවා තබා ඇති බවත්, දුරකතන අංක දහසකට එකවර කෙටි පණිවුඩ යැවිය හැකි ආකාරයේ තාක්ෂණික ක්රමවේදයක් ඔවුන් භාවිත කර ඇති බවත් අමෙරිකාවේ අභ්යන්තර ආරක්ෂක දෙපාර්තමේන්තුවේ විමර්ශන භාර නියෝජිත ඇඩම් පාර්ක්ස් ප්රකාශ කළ බව ඉන්ඩිපෙන්ඩන්ට් පුවත් සේවය වැඩිදුරටත් වාර්තා කළා.
සැක කටයුතු කෙටි පණිවුඩවලින් ප්රවේශම් වන ලෙස අභ්යන්තර ආරක්ෂක දෙපාර්තමේන්තුවේ විසින් දැනටමත් ෆ්ලොරිඩා, ටෙක්සාස්, කොලොරාඩෝ, කැලිෆෝනියා ඇතුළු ප්රාන්ත රැසක ජනතාවට උපදෙස් ලබා දී තිබෙන බව ද වාර්තා වනවා.
