ශ්‍රී ලංකාව ඇතුළු ලෝකයේ රටවල් රැසකට පූර්ණ චන්ද්‍රග්‍රහණයක් දැකබලා ගැනීමේ හැකියාව අද (07) දිනයේ පවතින බව කොළඹ විශ්වවිද්‍යාලයේ තාරකා විද්‍යා සහ අභාවකාශ විද්‍යා ඒකකයේ අධ්‍යක්‍ෂ මහාචාර්ය චන්දන ජයරත්න පවසනවා.

ඒ, අනුව අද (07) රාත්‍රී 8.58 සිට හෙට (08) අලුයම 2.25 දක්වා කාලය තුළ මෙම චන්ද්‍රග්‍රහණය නිරීක්ෂණය කිරීමේ හැකියාව පවතින බවයි මහාචාර්යවරයා පැවසුවේ.

පූර්ණ චන්ද්‍රග්‍රහණය සම්පූර්ණයෙන් දිස්වීම අද (07) රාත්‍රී 11.01 සිට හෙට (08) අලුයම 12.22ක් දක්වා කාලය තුළ සිදුවන බවයි ඔහු වැඩිදුරටත් සඳහන් කළේ.

එමෙන්ම මෙම චන්ද්‍රග්‍රහණය පූර්ණ වශයෙන් හෝ අර්ධ ග්‍රහණයක් වශයෙන් සියයට 85ක් පමණ ලෝක ජනතාවට දිස්වනු ඇති.

යළිත් මෙවැනි පූර්ණ චන්ද්‍රග්‍රහණයක් ශ්‍රී ලාංකිකයින්ට දැකගැනීමට හැකියාව හිමිවන්නේ 2028 වසරේදී බවයි මහාචාර්ය චන්දන ජයරත්න පැවසුවේ.

මේ අතර ඉතාලියේ වෙසෙන ඔබට රතු පැහැයට දිස්වන සඳක් දැකගත හැකි බව රෝමයේ සහ පැලර්මෝ හි ජාතික තාරකා භෞතික විද්‍යා ආයතනය පවසනවා.

මෙසේ සිදුවන්නේ පුර්ණ චන්ද්‍රග්‍රහණයක් හේතුවෙන් පෘතුවියේ හෙවනැල්ල සඳ මතට වැටීම හේතුවෙන් ඇතිවන පූර්ණ චන්ද්‍රග්‍රහණයක් හේතුවෙන්.

ඒ අනුව එදින සවස් කාලයේ අග භාගයේදී අර්ධ ඡායා අවධිය සවස 5:30 ට පමණ ආරම්භ වන අතර අර්ධ ග්‍රහණය පැයකට පසුව ආරම්භ වනවා.

සවස 7:30 ට පමණ, සම්පූර්ණත්වය එහි උච්චතම අවස්ථාවට පැමිණෙන අතර, පැයක් පමණ චන්ද්‍රයා තද රතු පැහැයෙන් දිලිසෙමින් අද්විතීය දර්ශනයක් නිර්මාණය කිරීමට නියමිතයි.

රාත්‍රී 8:10 ට පමණ එහි වඩාත් උච්චතම අවස්ථාවට පැමිණ චන්ද්‍රයා සම්පූර්ණයෙන්ම අඳුරු වනවා.

රාත්‍රී 11:00 වන විට ග්‍රහණය ක්‍රමයෙන් අවසන් වන අතර, අපගේ පෘථිවියේ සෙවනැල්ලෙන් පිටව යනු ඇති.