නිසාන් විසින් ජනප්‍රිය R35 GT-R නිෂ්පාදනය නිල වශයෙන් අවසන් කර තිබෙනවා.

ඒ අනුව මෝටර් රථ ඉතිහාසයේ ඇදහිය නොහැකි වසර 18 ක පරිච්ඡේදයක් වසා දමන බවයි විදෙස් මාධ්‍ය වාර්තා කළේ.

අවසාන ඒකක ජපානයේ ටොචිගි කම්හලේදී එකලස් කරන ලද අතර එය GT-R හි අලෙවි වූ අවසන් මෝටර් රථය වනවා.

2007 දී එහි ආරම්භක නිෂ්පාදනයේ සිට, R35 ලොව පුරා නිෂ්පාදනය කරන ලද ඒකක ප්‍රමාණය 48,000 ක් පමණ වනවා.

නිෂ්පාදනය අවසන් කළ අවසාන මෝටර් රථය මිඩ්නයිට් පර්පල් T-Spec වන අතර එය ජපානයේ වාසනාවන්ත පාරිභෝගිකයෙකුට ලබා දීමට නියමිත බවයි වාර්තා වන්නේ.

නිසාන් සභාපති සහ ප්‍රධාන විධායක නිලධාරී අයිවන් එස්පිනෝසා මෙසේ සඳහන් කර තිබෙනවා.

“විශිෂ්ට වසර 18 කට පසු, R35 GT-R මෝටර් රථ ඉතිහාසයේ කල් පවතින සලකුණක් තබා ඇත. ලොව පුරා සිටින GT-R හි බොහෝ රසිකයින්ට, මෙය සදහටම සමුගැනීමක් නොවේ, අපගේ ඉලක්කය වන්නේ GT-R නාම පුවරුව එක් දිනක් නැවත පැමිණීමයි. වීදිවල සිට ධාවන පථය දක්වා, සුපිරි මෝටර් රථ ක්‍රියාකාරිත්වය නැවත අර්ථ දැක්වූ ගොඩ්සිලා මෝටර් රථයක් ලෙස R35 GT-R සදහටම මතකයේ රැඳෙනු ඇත.”