වසර 11 කට පසු IPL තරගාවලියක අවසන් මහා තරගක් සඳහා සුදුසුකම් ලබන්නට පන්ජාබ් කිංග්ස් කණ්ඩායමට ඊයේ (01) රාත්‍රියේ හැකියාව ලැබුණා.

ඒ, මෙවර IPL තරගාවලියේ සුදුසුකම් ලබාගැනීමේ දෙවැනි තරගයේ දී මුම්බායි ඉන්දියන්ස් කණ්ඩායම පරාජයට පත්කරමින්.

අහමදාබාද් හිදී පැවති මෙම තරගය මුම්බායි ඉන්දියන්ස් කණ්ඩායම පරාජය කරමින් පන්ජාබ් කිංග්ස් කණ්ඩායම ජයගත්තේ කඩුලු 05කින්.

වර්ෂාවෙන් බාධා එල්ල වී පැවති මෙම තරගයේ පළමුව පන්දුවට පහරදුන් මුම්බායි පිතිකරුවන් නියමිත පන්දුවාර 20 තුළ කඩුලු 06ක් දැවී ලකණු 203ක් සිය ලකුණු පුවරුවට එක් කළා.

මුම්බායි ඉනිම වෙනුවෙන් තිලක් වර්මා සහ සුර්යකුමාර් යාදෙව් ලකුණු 44 බැඟින් රැස්කළ අතර, අස්මතුල්ලා ඔමාර්සායි මුම්බායි ඉනිමේ කඩුලු 02ක බැඟින් දවාගත්තා.

අනතුරුව ලකුණු 204ක ජයග්‍රාහී ඉලක්කයක් හඹා යාමට පිටියට පිවිසි පන්ජාබ් ක්‍රීඩකයින් අදාළ ඉලක්කය පාන්දුවර 19ක් තුළ කඩුලු 05ක් පමණක් දැවී පහසුවෙන් පසුකර ගියා.

එහිදී පන්ජාබ් ඉනිම ජයග්‍රහණය කරා රැගෙන යාමේ වගකීම භාරගත් නායක ශ්‍රෙයාස් අයියර් පන්දු 41ක් තුළ නොදැවී ලකුණු 87ක් රැස්කළේ හයේ පහර 08ක් සහ හතරේ පහර 05ක් ද සමඟින්.

ඊට අමතරව නෙහාල් වධේරා පන්දු 29කදී ලකුණු 48ක් රැස්කරමින් පන්ජාබ් ජයග්‍රහණයට දායක වුණා.

ඒ, අනුව මෙම තරගය මුම්බායි පිළ පරදා ජයගත් පන්ජාබ් කිංග්ස් කණ්ඩායම හෙට (03) රෝයල් චැලේන්ජස් බැංගලෝර් කණ්ඩායම සමඟ අවසන් මහා තරගය සඳහා සුදුසුකම් ලබාගත්තා.

මේ අතර IPL කණ්ඩායම් තුනක් අවසන් මහා තරගය සඳහා රැගෙන ගිය පළමු නායකයා බවට ශ්‍රෙයාස් අයියර් වාර්තා අතරට එක් වුණා.

මීට පෙර ඔහු දිල්ලි කැපිටල්ස් කණ්ඩායම සන කොල්කටා නයිට් රයිඩර්ස් කණ්ඩායම්වලට නායකත්වය ලබාදෙමින් එම කණ්ඩායම් දෙක IPL අවසන් මහා තරග සඳහා කැඳවාගෙන ගොස් තිබෙනවා.