දලයි ලාමාගේ අනුප්‍රාප්තිකයා චීනයෙන් පිටත උපත ලබනු ඇති බව ටිබෙට් බුද්ධාගමේ අධ්‍යාත්මික නායකයා සිය නවතම කෘතියේ සඳහන් කර තිබෙනවා.

89 හැවිරිදි වියේ පසු වූ දලයි ලාමාගේ අභාවයෙන් පසු දලයි ලාමාගේ ආයතනය දිගටම පවත්වාගෙන යාමට ලොව පුරා සිටින ටිබෙට් ජාතිකයින්ට අවශ්‍ය බව ඔහු විසින් ලියන ලද Voice for the Voiceless හි සඳහන් කර ඇතැයි රොයිටර්ස් වාර්තා කරනවා.

අධ්‍යාත්මික නායකයින්ගේ පෙළගැස්ම ඔහුගෙන් අවසන් විය හැකි බව ඔහු මීට පෙර පවසා තිබුණා.

ඔහුගේ අනුප්‍රාප්තිකයා චීනයෙන් පිටත යැයි ඔහු විස්තර කරන “නිදහස් ලෝකයේ” උපත ලබන බව දලයි ලාමා විසින් ප්‍රකාශ කළ පළමු අවස්ථාව මෙයයි.

ඔහු මීට පෙර පවසා ඇත්තේ ටිබෙටයෙන් පිටත, සමහර විට ඔහු පිටුවහල්ව ජීවත් වන ඉන්දියාවේ නැවත ඉපදිය හැකි බව පමණයි.

මාඕ සේතුංගේ කොමියුනිස්ට්වාදීන්ගේ පාලනයට එරෙහිව අසාර්ථක කැරැල්ලකින් පසු 1959 දී 14 වැනි දලයි ලාමා ටෙන්සින් ග්‍යාත්සෝ, 1959 දී තවත් දහස් ගණන් ටිබෙට් ජාතිකයන් සමඟ ඉන්දියාවට පලා ගියා.

ටිබෙට් අරමුණ සජීවීව තබාගැනීම වෙනුවෙන් 1989 වසරේ නොබෙල් සාම ත්‍යාගය දිනාගත් දලයි ලාමාව චීනය හඳුන්වනු ලබන්නේ “බෙදුම්වාදියෙකු” ලෙසයි.