සංචාරක ඉන්දීය කණ්ඩායම සහ ශ්‍රී ලංකා කණ්ඩායම අතර තරග තුනකින් සමන්විත එක් දින ක්‍රිකට් තරගාවලිය අද ආරම්භ වනවා.
මෙම තරග තුනම කොළඹ ආර් ප්‍රේමදාස ක්‍රීඩාංගනයේදී පැවැත්වෙන අතර අද තරගය ශ්‍රී ලංකා වේලාවෙන් පස්වරු 02:30ට ආරම්භ වීමට නියමිතයි.
ශ්‍රී ලංකා කණ්ඩායම මෙම තරගාවලියට පිවිසෙන්නේ දෙරට අතර පැවති විස්සයි විස්ස තරගාවලිය තුනට බින්දුවක් ලෙස පරාජය වී ඇති පසුබිමක් තුළයි.
ශ්‍රී ලංකා කණ්ඩායම එම තරගාවලියේදී ලැබූ පරාජයන් හේතුවෙන් බොහෝ පාර්ශවවල විවේචනයටද ලක්ව තිබෙනවා.
එවැනි තත්ත්වයක් තුළ ශ්‍රී ලංකා කණ්ඩායමේ හිටපු සුපිරි වේගපන්දු යවන්නෙකු වන ලසිත් මාලිංග සහ තාවකාලික පුහුණුකරු ලෙස කටයුතු කරන සනත් ජයසූරිය ශ්‍රී ලංකා ප්‍රේක්ෂකයන්ගෙන් ඉල්ලා සිටියේ කණ්ඩායම් දක්ෂතා පෙන්වමින් ජයග්‍රහණය කරවීමට අවශ්‍ය සහයෝගය ලබාදෙන ලෙසයි.
