බ්රිතාන්ය රජ පවුලේ කනගාටුදායක පුවත් වාර්තාවක් විදෙස් මාධ්ය අනාවරණය කරනවා.
ඒ අනුව චාල්ස් රජුගේ සෞඛ්ය තත්ත්වය දිනෙන් දින පිරිහෙමින් පවතින බවට රාජකීය ආරංචි මාර්ග උපුටමින් බ්රිතාන්යයේ පළවන ග්ලෝබ් පුවත්පත හෙළි කරනවා.
මේ හේතුවෙන් ඔහු තම පුත් විලියම් කුමරු වෙත රාජ්ය වගකීම් භාර දීමට සූදානම් වන බවද එහි වාර්තා කර තිබෙනවා.
වයස අවුරුදු 76ක් වන රජතුමා පසුගියදා සැන්ඩ්රින්හැම් රාජකීය නිවෙසේ පිහිටි සාන්ත මේරි මැග්ඩලීන දේවස්ථානයේ පැවති පූජා පිළිවෙතකට සහභාගී වුණා.
එහිදී චර්ච් ඔෆ් ඉංග්ලන්ඩ් පල්ලියේ පූජක විලියම්ස් සමඟ සාකච්ඡාවක නිරත වූ අවස්ථාවේ රජතුමා දැඩි මානසික පීඩනයකින් පසුවන බව දක්නට ලැබි තිබෙනවා.
“රජතුමා සාමාන්යයෙන් ඉරිදා පූජා පිළිවෙත්වලට සහභාගී වන්නේ ඉතා සතුටින්. නමුත් මෙවර එතුමා දැඩි මානසික අවපීඩනයකින් පසුවන බව පැහැදිලිව පෙනුණා. එක අවස්ථාවක එතුමා දෑත් දෙකෙන් මුහුණ වසාගෙන සිටියා,” යැයි රාජකීය තොරතුරු දන්වා සිටි ආරංචි මාර්ගයක් සඳහන් කර තිබෙනවා.
රජතුමාගේ පිළිකා රෝගී තත්ත්වය බරපතල අතට හැරී ඇති බව වාර්තා වන අතර, එය රාජකීය වගකීම් ඉටු කිරීමට බාධාවක් වී තිබෙනවා.
මේ හේතුවෙන් රාජ වගකීම් බොහොමයක් විලියම් කුමරු වෙත පවරමින් සිටින බව සඳහන්.
“රජතුමා දැන් වැඩිපුර ආගමික කටයුතුවල නිරත වෙනවා. එතුමා නිතර දේවස්ථානයට යනවා, පූජකතුමා සමඟ පෞද්ගලික සාකච්ඡාවල යෙදෙනවා,” යැයි රාජ මාලිගා ආරංචි මාර්ග පවසනවා.
ග්ලෝබ් පුවත්පත වාර්තා කරන ආකාරයට රජතුමාගේ රෝගී තත්ත්වය රාජ මාලිගාව විසින් ප්රකාශයට පත් කර ඇති තරම් සුළු එකක් නොවේ. “පිළිකාව එතුමාගේ ශරීරය ක්රමයෙන් දුර්වල කරමින් පවතිනවා. මේ නිසා විලියම් කුමරු සිංහාසනය භාර ගැනීමට සූදානම් කිරීමට සිදුව තිබෙනවා,” යැයි ඔවුන් පෙන්වා දෙනවා.
විලියම් කුමරුට ද මේ සමයේ තම බිරිඳ වන කේට් කුමරිය රැකබලා ගැනීමේ වගකීම පැවරී තිබෙනවා.
ඇයද පිළිකා රෝගයෙන් පෙළෙන බවයි වාර්තා වන්නේ.
මේ අතර, හැරී කුමරු සහ මේගන් සමඟ පවතින අවිනිශ්චිත සබඳතා ද රාජ පවුලට අමතර පීඩනයක් ගෙන දී තිබෙනවා.
චාල්ස් රජතුමාට තම මව වන එලිසබෙත් රැජින මියගිය පසු, වයස 73දී රජ කිරීටය හිමිවුණා.
එහෙත් වසර දෙකක් වැනි කෙටි කාලයක් තුළ සිංහාසනය අතහැර යාමට සිදුවීම ගැන එතුමා දැඩි කනගාටුවෙන් පසුවන බවයි රාජ මාලිගා ආරංචි මාර්ග පෙන්වා දෙන්නේ.
“විලියම් කුමරු තම පියා මෙන් වයස්ගත වූ පසු සිංහාසනයට පත්වේවි යැයි සිතා සිටියා. නමුත් දැන් ඊට බොහෝ කලින් එම වගකීම භාර ගැනීමට සිදුව තිබෙනවා. රාජ පවුලේ සහ රටේ යහපත වෙනුවෙන් ඔහු ඒ සඳහා සූදානම්,” යැයි රාජකීය ආරංචි මාර්ග තවදුරටත් සඳහන් කරනවා.
රජතුමා දැන් තම ශාරීරික සෞඛ්යය මෙන්ම ආධ්යාත්මික සුවය ද සොයමින් සිටින බව පැහැදිලි වනවා. එතුමා තම ලෙඩ රෝග සමඟ සටන් කරමින්, හැකි තාක් දුරට රාජ වගකීම් ඉටු කිරීමට උත්සාහ දරන නමුත්, අනාගතය සඳහා විලියම් කුමරු සූදානම් කිරීමේ කාර්යයට ද මුල් තැන දී තිබෙනවා.
රාජකීය උපදේශකවරුන්ගේ, වෛද්යවරුන්ගේ සහ ආගමික නායකයින්ගේ උපදෙස් මත රජතුමා වැඩි වැඩියෙන් යැපෙමින් සිටින බව ද වාර්තා වනවා.
මේ අතර, රාජ පවුලේ සාමාජිකයන් සියලු දෙනා මේ අභියෝගාත්මක කාලය තුළ එකිනෙකාට සහය වෙමින් සිටිනවා.
