2025 ශූරයින්ගේ කුසලාන ක්‍රිකට් තරගාවලිය දෙමුහුන් ආකෘතිය යටතේ පැවැත්වීම සඳහා එක්සත් අරාබි එමීර් රාජ්‍යය තෝරාගෙන තිබෙනවා.
මෙම තෝරා ගැනීමත් සමඟ එළඹෙන ශූරයින්ගේ කුසලාන තරගාවලිය පාකිස්ථානයේ සත්කාරකත්වය යටතේ පාකිස්ථානයේ සහ එක්සත් අරාබි එමීර් රාජ්‍යයේ පැවැත්වීමට අවසන් තීරණය ගෙන ඇති බවයි ක්‍රීඩා මාධ්‍ය වාර්තා කළේ.
ඒ, අනුව මෙම තරගාවලියේ ඉන්දීය කණ්ඩායම ක්‍රීඩාකරන තරග සියල්ල අරාබි එමීර් රාජ්‍යයේ දී පැවැත්වීමට නියමිතයි.
තරගාවලිය සඳහා පාකිස්තානයේ සංචාරය කිරීමට ඉන්දීය කණ්ඩායම ප්‍රතික්ෂේප කිරීමත් සමඟ දැඩි මත ගැටුම් මැද තරගාවලිය රටවල් දෙකක පැවැත්වීමට සඳහා පාකිස්ථාන ක්‍රිකට් පාලක මණ්ඩලය සහ ජාත්‍යන්තර ක්‍රිකට් කවුන්සිලය එකඟතාවයට පැමිණියා.
එම එකඟතාවයට අනුවයි තරගාවලිය දෙමුහුන් ආකෘතිය යටතේ පැවැත්වීමට එක්සත් අරාබි එමීර් රාජ්‍යය තෝරාගෙන ඇත්තේ.
ඒ, අනුව ඉන්දීය කණ්ඩායම සමඟ තරග කිරීම සඳහා අනෙකුත් කණ්ඩායම්වලට පාකිස්තානයේ සිට එක්සත් අරාබි එමීර් රාජ්‍යය බලා ගමන් කිරීමට සිදුවනු ඇති අතර, බොහෝ දුරට එම තරග ඩුබායිහිදී පැවැත්වීම ඉඩකඩ පවතින බවයි තොරතුරු වාර්තා වුණේ.
වත්මන් ශූරයින් වන පාකිස්ථානය පෙබරවාරි 19 වනදා නවසීලන්තයට එරෙහිව කරච්චිහි දී 2025 ශූරයින්ගේ කුසලාන තරගාවලිය ආරම්භ කිරීමට නියමිතයි.
