‘G20’ සමුළුවට සහභාගී වීමට බ්‍රසීලයේ රියෝ දි ජිනැයිරෝ බලා යන අතරතුරේ, ඇමෙරිකා ජනාධිපති ජෝ බයිඩන්, ඇමසන් වැසි වනාන්තරය නැරඹීමට ගියා.
බයිඩන් සමඟ ජාත්‍යන්තර මාධ්‍ය කණ්ඩායමක් ද ඇමසන් වනාන්තරයට ගිය අතර, බයිඩන් වනාන්තරය මැද විශේෂ මාධ්‍ය හමුවක් ද පැවැත්වූවා.
ඊට අදාළ සියළු උපාංග බයිඩන්ගේ සහායක කණ්ඩායම විසින් වනාන්තරයට රැගෙන ගොස් තිබුණා.
මාධ්‍ය හමුව අවසානයේ මාධ්‍යවේදීන් විසින් බයිඩන්ගෙන් ප්‍රශ්න ඇසුවා.
ඒ, ඇමෙරිකාව, යුක්රේනයට ලබා දී ඇති දිගු දුර මිසයිල යොදා ගනිමින්, රුසියාවේ ඉලක්ක වෙත පහර දෙන්නැයි බයඩන් දුන් අවසරය සම්බන්ධයෙන්.
කෙසේ නමුත් ජනාධිපති බයිඩන් මාධ්‍යවේදීන් ඇසූ එම ප්‍රශ්න නෑසුණා සේ මඟ හැර මාධ්‍ය හමුව අවසන් කර පිටුපස වනාන්තරයට ඇවිද යන්න වුණා.
එහිදී බයිඩන්ගේ සහායකයන් ‘ජනාධිපතිතුමනි ඔහෙ කවුරුවත් නැහැ. මෙහෙ එන්න’ යැයි පවසමින් බයිඩන් ආපසු ගෙන්වා ගන්නා වීඩියෝ දසුන් පෙළක් මේ වනවිට සමාජ මාධ්‍ය ඔස්සේත් විදෙස් පුවත් සේවා ඔස්සේත් ප්‍රසිද්ධියට පත් වී තිබෙනවා.
81 හැවිරිදි බයිඩන්, ඇමෙරිකා ජනාධිපති ධුරයේ සිටින වයස්ගතම පුද්ගලයාය. වයස නිසා අමතක වීම් සිදුවන බැවින් බයිඩන් අකරතැබ්බ රැසකට මුහුණ පා තිබෙනවා.
මෙවර ඇමෙරිකන් ජනාධිපතිවරණයට ද මුලින් ඉදිරිපත් වූයේ බයිඩන්. කෙසේ නමුත් බයිඩන්ට ඔහුගේ වයස බාධාවක් වුණා. ඒ අනුව, අකමැත්තෙන් බයිඩන් ජනාධිපතිවරණ සටනින් ඉවත් වූයේත් බයිඩන්ගේ දෙවැනියා කමලා හැරිස් ජනාධිපතිවරණ සටනට ඉදිරිපත් වූයේත් ඒ අනුවයි.
ඇමසන් වැසි වනාන්තරය ලතින් ඇමෙරිකා රටවල් කීපයකට අයත් වනවා.
එයින් වැඩි කොටසක් අයත් වන්නේ බ්‍රසීලයටයි.
ජනාධිපති බයිඩන්, රැගත් ‘එයාර් ෆෝස් 1’ නිල ගුවන් යානය, රියෝ දි ජිනැයිරෝ බලා යද්දී, මනාවුස් නගරයට ගොඩ බෑ අතර, බයිඩන් ඉන්පසු සිය ආරක්ෂක අංශ සාමාජිකයන් ද පිරිවරාගෙන‘මැරීන් 1’ හෙලිකොප්ටර් යානයේ නැගී ඇමසන් වැසි වනාන්තරයට ගිය බවයි විදෙස් මාධ්‍ය වාර්තා කළේ.
පා ගමනින් වැසි වනාන්තරයේ ඇවිද ගිය බයිඩන්, වනාන්තරය මැදදී ඇමසන් වැසි වානන්තරය ද ඇතුළු ලෝකයේ සෙසු වනාන්තර සංරක්ෂණ දිනය ලෙස නොවැම්බර් 17 වැනිදා නම් කරමින් විශේෂ ලියවිල්ලකට ද අත්සන් කළා.
එම අවස්ථාවට, මාධ්‍යවේදීන් අමතරව, බ්‍රසීල රජයේ නිලධාරීන්, ඇමසන් ස්වදේශීය ගෝත්‍රික වැසියන්ගේ නියෝජිතයන්, පරිසරවේදීන් ඇතුළු පිරිසක් සහභාගී වූ බව පැවැසෙන අතර බයිඩන් මාධ්‍ය හමුව පැවැත්වූයේ ඉන් අනතුරුවයි.
