ලිංගික අපරාධ චෝදනා එල්ල වී සිටියදී සිරගෙදරදී මියගිය අමෙරිකානු ප්‍රකෝටිපති ජෙෆ්රි එප්ස්ටයින් (Jeffrey Epstein), රුසියානු ජනාධිපති ව්ලැදිමීර් පුටින් සහ එරට ඉහළ පෙළේ නිලධාරීන් සමඟ සමීප සබඳතා පැවැත්වීමට දැඩි උත්සාහයක නිරත වූ බව අනාවරණය වී තිබේ.

අමෙරිකානු අධිකරණ දෙපාර්තමේන්තුව මගින් අලුතින් නිකුත් කරන ලද ලේඛන මගින් මේ බව හෙළි වී තිබේ.

2013 වසරේදී එප්ස්ටයින් එවකට යුරෝපා කවුන්සිලයේ මහලේකම්වරයා වූ තෝර්බ්ජෝන් ජැග්ලන්ඩ් (Thorbjørn Jagland) හරහා රුසියානු ජනාධිපතිවරයා හමුවීමට උත්සාහ කර ඇත.

රුසියාවට බටහිර ආයෝජන ආකර්ෂණය කරගන්නා ආකාරය පිළිබඳව ජනාධිපති පුටින්ට උපදෙස් දීමට තමන්ට හැකි බව ඔහු පවසා තිබේ.

තමන් බිල් ගේට්ස්ගේ (Bill Gates) සමීප උපදේශකයෙකු ලෙස හඳුන්වා දෙන ලෙසත්, අවම වශයෙන් පැය දෙක තුනක සාකච්ඡාවක් අවශ්‍ය බවත් ඔහු ඉල්ලා ඇත.

මේ අතර, පෝලන්ත අග්‍රාමාත්‍ය ඩොනල්ඩ් ටුස්ක් (Donald Tusk) පවසා ඇත්තේ මෙම අපරාධ ජාලය පිටුපස රුසියානු බුද්ධි අංශ (Intelligence Services) සිටියේද යන්න පිළිබඳව තම රට පරීක්ෂණයක් ආරම්භ කරන බවයි.

ලෝක නායකයන් පිළිබඳ අපකීර්තිමත් තොරතුරු (Compromising materials) රැස් කිරීම සඳහා රුසියාව මෙම මෙහෙයුම සංවිධානය කරන්නට ඇති බවට සැකයක් පවතින බව ඔහු සඳහන් කළේය.

කෙසේ වෙතත්, ක්‍රෙම්ලිනය මෙම චෝදනා තරයේ ප්‍රතික්ෂේප කර ඇත.

එක්සත් ජාතීන්ගේ සංවිධානයේ හිටපු රුසියානු තානාපති විටාලි චුර්කින් සමඟ එප්ස්ටයින් නිතිපතා හමු වී ඇති අතර, ඔහුගේ අභාවයෙන් පසු රුසියානු විදේශ අමාත්‍ය සර්ජි ලැව්රොව් (Sergey Lavrov) හමුවීමට මඟ පාදා ගැනීමට උත්සාහ කර ඇත.

රුසියාවේ ප්‍රධාන ආරක්ෂක සේවය වන FSB හි පුහුණුව ලැබූ සර්ජි බෙල්යාකොව් සමඟ එප්ස්ටයින් සමීපව කටයුතු කර තිබේ.

එක් අවස්ථාවක මොස්කව් සිට පැමිණි තරුණියක් නිව්යෝර්ක් ව්‍යාපාරිකයන් බ්ලැක්මේල් කිරීමට උත්සාහ කරන බව පවසමින් එය වැළැක්වීමට එප්ස්ටයින් බෙල්යාකොව්ගේ සහය පතා ඇත.

පියාසර දත්ත වාර්තා (Flight logs) පෙන්වා දෙන්නේ 2002 වසරේදී එප්ස්ටයින් සහ ඔහුගේ සහකාරියක වූ ගිස්ලේන් මැක්ස්වෙල් මොස්කව් සහ සාන්ත පීටර්ස්බර්ග් වෙත සංචාරය කර ඇති බවයි.

එසේම 2019 වසරේ අත්අඩංගුවට පත්වීමට මාස කිහිපයකට පෙරත් ඔහු රුසියානු වීසා ලබා ගැනීමට උත්සාහ කර තිබේ.

මෙම නවතම හෙළිදරව් කිරීම් සමඟ, එප්ස්ටයින් හුදෙක් ප්‍රකෝටිපතියෙකු පමණක් නොව, ජාත්‍යන්තර දේශපාලන ක්‍රීඩාවක නිරත වූ චරිතයක් ද යන්න පිළිබඳව ලෝක අවධානය යොමු වී ඇත.