අමෙරිකාවේ ‘ග්රීන් කාඩ්’ (Green Card) ලොතරැයි වැඩසටහන වහාම ක්රියාත්මක වන පරිදි අත්හිටුවීමට ජනාධිපති ඩොනල්ඩ් ට්රම්ප් පියවර ගෙන තිබේ.
ඒ, බ්රවුන් විශ්වවිද්යාලයේ සහ MIT ආයතනයේ සිදුවූ දරුණු වෙඩි තැබීම්වලට සම්බන්ධ සැකකරු අමෙරිකාවට ඇතුළු වී ඇත්තේ වීසා ලොතරැයි වැඩසටහන හරහා බව අනාවරණය වීමත් සමඟයි.
මෙම තීරණය ප්රකාශයට පත් කරමින් අමෙරිකානු දේශීය ආරක්ෂක ලේකම් ක්රිස්ටි නොයෙම් සඳහන් කළේ, ජනාධිපතිවරයාගේ උපදෙස් පරිදි එක්සත් ජනපද පුරවැසි සහ සංක්රමණ සේවා (USCIS) ආයතනය වෙත මෙම වැඩසටහන තාවකාලිකව නැවැත්වීමට නියෝග කළ බවයි.
48 හැවිරිදි පෘතුගාල ජාතිකයෙකු වන ක්ලෝඩියෝ නෙවෙස් වැලෙන්ටේ නැමැත්තා මෙම ප්රහාරවල සැකකරු ලෙස හඳුනාගෙන තිබේ.
බ්රවුන් විශ්වවිද්යාලයේදී සිදුවූ වෙඩි තැබීමෙන් සිසුන් දෙදෙනෙකු මියගොස් නව දෙනෙකු තුවාල ලැබූ අතර, MIT මහාචාර්යවරයෙකු ද මොහු අතින් ජීවිතක්ෂයට පත්විය.
පොලිස් මෙහෙයුම් අතරතුර සැකකරු තමා විසින්ම වෙඩි තබාගෙන මියගොස් සිටියදී සොයාගෙන තිබුණි.
නෙවෙස් වැලෙන්ටේ 2017 වසරේදී මෙම වීසා ලොතරැයිය හරහා අමෙරිකාවේ ස්ථිර පදිංචිය ලබාගෙන ඇති බව බලධාරීන් තහවුරු කර තිබේ.
සෑම වසරකම අමෙරිකාවේ අඩු නියෝජනයක් සහිත රටවල ජනතාව වෙනුවෙන් හරිත කාඩ්පත් (Green Cards) 50,000ක් පමණ මෙම ලොතරැයිය මඟින් පිරිනැමෙයි.
ජනාධිපති ට්රම්ප් දීර්ඝ කාලයක සිට මෙම වැඩසටහනට විරුද්ධත්වය පළ කළ අතර, මෙම ඛේදජනක සිදුවීමත් සමග ඔහු සිය සංක්රමණ ප්රතිපත්ති දැඩි කිරීමට පියවර ගෙන තිබේ.
