ලෝක සෞඛ්‍ය සංවිධානය (WHO) විසින් නිකුත් කරන ලද නව මාර්ගෝපදේශ යටතේ තරබාරුකම සඳහා දිගුකාලීන ප්‍රතිකාර ලෙස Ozempic ඖෂධ අනුමත කර තිබේ.

ප්‍රතිකාර වඩාත් දැරිය හැකි සහ ලෝකයේ ඕනෑම අයෙකුට මිලට ගතහැකි බව සහතික කරන ලෙසයි ලොව පුරා රජයන් සහ සෞඛ්‍ය පද්ධතිවලින් ඉල්ලා ඇත්තේ.

කෙසේ වෙතත්, නිෂ්පාදනයේ වේගවත් ව්‍යාප්තියක් සමඟ බර අඩු කර ගැනීමේ ඖෂධ 2030 වන විට ප්‍රතිලාභ ලැබිය හැකි අයගෙන් සියයට 10 කටත් වඩා අඩු පිරිසකට ළඟා වනු ඇතැයි WHO අනතුරු අඟවයි.

වැඩිවන මහජන සෞඛ්‍ය අභියෝගය වෙනුවෙන් WHO තරබාරුකම ඇති පුද්ගලයින් සඳහා Ozempic හෝ Wegovy වැනි ග්ලූකගන් වැනි පෙප්ටයිඩ-1 (GLP-1) මත පදනම් වූ ඖෂධ භාවිතය පිළිබඳ මාර්ගෝපදේශ සකස් කෙරිණ.

අමෙරිකානු වෛද්‍ය සංගමයේ (JAMA) ජර්නලය විසින් මීට අදාල මාර්ගෝපදේශ, ශාරීරික ක්‍රියාකාරකම්, ආහාර සහ නිතිපතා උපදේශන සැසි වැනි තරබාරුකම ඇති වැඩිහිටියන් සඳහා බර කළමනාකරණය සඳහා දිගුකාලීන GLP-1 ප්‍රතිකාර භාවිතා කිරීමට නිර්දේශ කරනු ලබයි.

තරබාරුකම මේ වනවිට ප්‍රධාන ගෝලීය සෞඛ්‍ය අභියෝගයක් වී ඇති අතර, එය පාලනය කිරීම සඳහා ලොව පුරා රටවල්වල ජනතාවට සහාය දීමට කැපවන බවයි WHO අධ්‍යක්ෂ ජනරාල් ටෙඩ්‍රොස් අද්නාම් ගෙබ්‍රෙයිසු කියාසිටියේ.

නව මාර්ගෝපදේශ අනුව තරබාරුකම නිදන්ගත රෝගයක් ලෙසයි හඳුනාගෙන ඇත්තේ.

ඖෂධ මගින් පමණක් මෙම ගෝලීය සෞඛ්‍ය අර්බුදය විසඳිය නොහැකි වුවද, GLP-1 ප්‍රතිකාර මගින් මිලියන ගණනකට තරබාරුකම ජය ගැනීමට සහ ඒ ආශ්‍රිත හානි අවම කිරීමට උපකාරී වන බව ලෝක සෞඛ්‍ය සංවිධාන අධ්‍යක්ෂවරයා සඳහන් කළේය.

මෙම ඖෂධ දෙවන වර්ගයේ දියවැඩියාව ඇති පුද්ගලයින්ට ප්‍රතිකාර කිරීම සඳහා වන නමුත් තරබාරුකම කළමනාකරණය කිරීමට මිනිසුන්ට උපකාර කිරීම සඳහා මේ වනවිට ප්‍රමුඛත්වයක් ලබා ඇති බව සඳහන්.

පසුගිය වසරේ දී බෝ නොවන රෝගවලින් තරබාරුකමට සම්බන්ධ මරණ මිලියන 3.7 ක් සිදුවී ඇති අතර, ලෝක සෞඛ්‍ය සංවිධානය ප්‍රකාශ කළේ ඉන් ඇතිවන ගෝලීය ආර්ථික බලපෑම 2030 වන විට වසරකට ඇමරිකානු ඩොලර් ට්‍රිලියන 3 දක්වා ළඟා වනු ඇති බවයි.

ලෝකය වසර 100 ක් ඇතුළත ගෝලීය මන්දපෝෂණය ප්‍රධාන ගෝලීය සෞඛ්‍ය අර්බුදයක් වූ තත්වයක සිට දැන් අතිරික්ත බර ඇති තත්වයකට ගමන් කර ඇති බවද ජනරාල්වරයා කියා සිටියේය.

තරබාරුකමට ඵලදායී ලෙස ප්‍රතිකාර කිරීමට ඇති ප්‍රධාන බාධකයක් වී ඇත්තේ අපගේ ආහාර රුචිය බවයි ඔහු පවසන්නේ.

තරබාරුකම නිදන්ගත රෝග සහ අකල් මරණයට ප්‍රධාන හේතුවක් ලෙස පවතින අතර එය ලොව පුරා බිලියනය කට අධික ජනතාවකට බලපාන අතර ලෝකයේ සෑම රටකම පාහේ රෝගීන් වැඩි වෙමින් පවතියි.

Wegovy ඇතුළු GLP-1 පාදක ඖෂධ ලබා ගන්නා පුද්ගලයින් සඳහා සියදිවි නසාගැනීමේ සිතුවිලි සහ හැසිරීම් ඇතිවීමේ අවදානමක් පිළිබඳව ආරක්ෂිත අනතුරු ඇඟවීමක් නිකුත් කිරීමෙන් පැය කිහිපයකට පසුවයි ලෝක සෞඛ්‍ය සංවිධානය මෙම මාර්ගෝපදේශ නිකුත් කර ඇත්තේ.