නීතිවිරෝධී ලෙස ශ්‍රී ලංකාවට රැගෙන විත්, විකිණීම සඳහා වත්තල ප්‍රදේශයේ සුරතල් සතුන් අලෙවි මධ්‍යස්ථානයක උඩු මහළේ සගවා ගෙන සිටි විදේශීය පිඹුරන් සිව් දෙනෙකු සහ ශ්‍රී ලංකාවේ ගැට කිඹුලෙකු සමග එම අලෙවි සැළේ හිමිකරු සහ එහි සේවකයින් දෙදෙනෙකු වත්තල පොලිසිය විසින් අත්අඩංගුවට ගෙන තිබෙනවා.
බම්බල් බී, ස්පයිඩර් කැළිපර් සහ බනානා යන වර්ග වලට අයත් පිඹුරන් පිරිමි සතුන් දෙදෙනෙකු සහ ගැහැණු සතුන් දෙදෙනෙකු ඒ අතර සිටින බවයි පොලිසිය පැවසුවේ.
මොවුන් ගුවන් මගින් සිය ගමන් මලු තුළ සඟවාගෙන මෙරටට ගෙන එන්නට ඇති බවයි පොලිසිය සැක කරන්නේ.
මෙම ගැට කිඹුලා ශ්‍රී ලංකාවේ වියළි කළාපීය ප්‍රදේශයක පිහිටි වැවකින් අල්ලා ගන්නට ඇතැයි පොලිසිය සැක කරන අතර මෙම එක් සතෙකු රුපියල් ලක්ෂ තුනකට ඉහළ මිළකට අලෙවි කිරීම සදහා සූදානම් කර තිබියදී මෙලෙස පොලිසිය විසින් අත්අඩංගුවට ගෙන තිබුණා.
මෙම සතුන් දෙහිවල සත්වෝද්‍යානය වෙත යොමු කර ඔවුන් පිළිබඳ වාර්තාවක් ලබා ගැනීමට පොලිසිය පියවර ගෙන ඇති අතර මෙලෙස අත් අඩංගුවට ගත් සතුන් සහ එම සුරතල් සතුන් අලෙවි සැළේ හිමිකරු ඇතුළු සේවකයින් වත්තල මහේස්ත්‍රාත් අධිකරණය වෙත ඉදිරිපත් කිරීමට ද නියමිතයි.
