න්‍යෂ්ටික සබ්මැරීන දෙකක් සුදුසු කලාපවල ස්ථානගත කරන ලෙස අමෙරිකානු ජනාධිපති ඩොනල්ඩ් ට්‍රම්ප් නියෝග කර තිබෙනවා.

ඒ රුසියාවේ හිටපු ජනාධිපති සහ වත්මන් ආරක්ෂක කවුන්සිලයේ නියෝජ්‍ය සභාපති දිමිත්‍රි මෙද්වදේව් විසින් සිදු කරන ලද ඉහළ ප්‍රකෝපකාරී ප්‍රකාශයන්ට ප්‍රතිචාර වශයෙන්.

යුක්‍රේන ගැටුම සම්බන්ධයෙන් අමෙරිකාව සහ රුසියාව අතර වර්ධනය වන උණුසුම්කාරී වාතාවරණය මධ්‍යයේ, මෙම පියවර පූර්වාරක්ෂාකාරී ක්‍රියාමාර්ගයක් ලෙසයි සැලකෙන්නේ.

ජනාධිපති ට්‍රම්ප් මෙම නිවේදනය සිදු කළේ ‘ටෘත් සෝෂල්’ (Truth Social) සමාජ මාධ්‍ය වේදිකාව ඔස්සේ වන අතර, මෙද්වදේව්ගේ ප්‍රකාශ හුදු වචනවලින් ඔබ්බට යා හැකි බවට ඔහු එහිදී අනතුරු අඟවා තිබිණා.

සටන් විරාමයකට එකඟ වන ලෙස හෝ දැඩි තීරුබදු වලට මුහුණ දෙන ලෙස ජනාධිපති ට්‍රම්ප් විසින් රුසියාවට අවසාන නිවේදනයක් නිකුත් කිරීමෙන් අනතුරුව, මෙද්වදේව් විසින් සීතල යුධ සමයේ පැවති සෝවියට් දේශයේ “ඩෙඩ් හෑන්ඩ්” (dead hand) නම් ස්වයංක්‍රීය න්‍යෂ්ටික ප්‍රතිප්‍රහාර එල්ල කිරීමේ පද්ධතියක් ගැන සඳහන් කර තිබුණා.

ස්ථානගත කර ඇති සබ්මැරීනවල නිශ්චිත පිහිටීම හෙළිදරව් කර නොමැති අතර, ආරක්ෂක හේතූන් මත ඇමරිකාව සාමාන්‍යයෙන් එවැනි තොරතුරු රහසිගතව තබා ගන්නවා.

ජනාධිපති ට්‍රම්ප් විසින් නියෝග කරන ලද්දේ න්‍යෂ්ටික අවිවලින් සන්නද්ධ සබ්මැරීන ද, එසේත් නැතිනම් න්‍යෂ්ටික බලයෙන් ක්‍රියාත්මක වන නමුත් සාම්ප්‍රදායික අවි දරණ සබ්මැරීන ද යන්න පැහැදිලි නැත. කෙසේ වෙතත්, මෙම වර්ග දෙකටම රුසියාවට එරෙහිව උපායමාර්ගිකව තර්ජනයක් එල්ල කිරීමේ හැකියාව පවතිනවා.

මෙම නියෝගය, සීතල යුධ සමයේ පැවති න්‍යෂ්ටික බල අරගලය සිහිගන්වන, දෙරටේ වාග් ප්‍රහාර සහ යුධමය සූදානමෙහි සැලකිය යුතු වර්ධනයක් සනිටුහන් කරනවා.

න්‍යෂ්ටික තර්ජනවලට ප්‍රතිචාර දැක්වීමේදී සූදානමේ වැදගත්කම සහ තත්ත්වයේ බරපතළකම ජනාධිපති ට්‍රම්ප් විසින් අවධාරණය කළ අතර දිමිත්‍රි මෙද්වදේව් රුසියාවේ ප්‍රධාන තීරණ ගන්නා පුද්ගලයා නොවුනද, ඔහු ආරක්ෂක කවුන්සිලයේ ප්‍රබල හඬක් වන අතර ප්‍රකෝපකාරී ප්‍රකාශ සිදු කිරීම සම්බන්ධයෙන් ප්‍රසිද්ධියක් උසුලනවා.

රුසියාව, යුක්‍රේනයේ යුද්ධය අවසන් කිරීම සඳහා යොමු කරවීමට ජනාධිපති ට්‍රම්ප් විසින් ලබා දුන් කාලසීමාව දැඩි කිරීම සහ මොස්කව් පාලනයට හා එහි මිත්‍ර පාර්ශ්වයන්ට එරෙහිව සම්බාධක පනවන බවට දිගින් දිගටම සිදුකළ තර්ජන මෙම උණුසුම්කාරී තත්ත්වයේ පසුබිම වුණා.

න්‍යෂ්ටික සබ්මැරීන යෙදවීම පිළිබඳ ට්‍රම්ප්ගේ ප්‍රසිද්ධ ප්‍රකාශය, රුසියාවේ ක්‍රියාකලාපය සහ වාග් ප්‍රහාර සම්බන්ධයෙන් ඇමරිකාව කලකිරීමේ ප්‍රතිඵලයක් වනවා.