බංග්ලාදේශයේ ඩකා අගනුවරදී, හින්දු ජාතික වෙළෙන්දෙකුට පිරිසක් විසින් පහර දී මරා දමා තිබෙනවා.
මෙම සමූහ ලඝුඝාතනය (mob lynching) පිළිබඳ සිදුවීම රට පුරා දැඩි කම්පනයක් ඇති කර තිබෙන බවයි විදෙස් මාධ්ය වාර්තා කළේ.
ජූලි 9 වන දින මිට්ෆෝර්ඩ් රෝහල අසලදී, 39 හැවිරිදි ලාල් චන්ද් සෝහාග් නමැති මෙම ව්යාපාරිකයාට ප්රහාරකයින් විසින් පළමුව ගඩොල් සහ ගල්වලින් පහර දී, අනතුරුව ඔහුගේ හිස සහ ශරීරය කුඩු පට්ටම් වන සේ තලා දමා තිබෙනවා.
ප්රහාරක කණ්ඩායම ව්යාපාරිකයාගේ ඇඳුම් පවා ඉවත් කර ඇති අතර, ඇතැම් ප්රහාරකයින් ඔහුගේ සිරුර මතට නැග පනිමින් සහ නටමින් සිටිනු දක්නට ලැබී ඇති බවයි වාර්තා වන්නේ.
මාධ්ය වාර්තා පෙන්වා දෙන පරිදි, මෙම ප්රචණ්ඩත්වයට හේතුව බලහත්කාරයෙන් කප්පම් ගැනීමක් සහ ව්යාපාරික ආරවුලක් බව පැවසෙනවා.
එනමුත්, සිදුවීම පිටුපස ඇති සැබෑ අරමුණ මෙතෙක් අනාවරණය වී නැහැ.
මෙම සිදුවීමෙන් අනතුරුව, රට පුරා දැවැන්ත විරෝධතා ආරම්භ වී තිබෙනවා.
ඝාතනය සම්බන්ධයෙන් විමර්ශනය කිරීම සඳහා ඉහළ පෙළේ කමිටුවක් පත් කරන ලෙස ඉල්ලා නීතිඥ යුනුස් අලි අකන්ද් විසින් ඉරිදා දිනයේ මහාධිකරණයට පෙත්සමක් ගොනු කර තිබුණා.
මෙම නඩුවට අදාළව සැකකරුවන් 19 දෙනෙකු නම් කර ඇති අතර, තවත් හඳුනා නොගත් 15-20 අතර පිරිසක්ද ඊට සම්බන්ධ බවයි පැවසෙන්නේ.
පොලීසිය මේ වන විට පුද්ගලයින් පස් දෙනෙකු අත්අඩංගුවට ගෙන තිබෙනවා.
මෙම සිදුවීම සම්බන්ධයෙන් ලාල් චන්ද්ගේ සොහොයුරිය වන 42 හැවිරිදි මන්ජුආරා බෙගම් විසින් බ්රහස්පතින්දා දිනයේ පොලිස් ස්ථානයට ඝාතනය පිළිබඳ පැමිණිල්ලක් ගොනු කර තිබුණා.
මෙම සිද්ධියට අදාළව මහමුදුල් හසන් මොහින්, තාරෙක් රහමාන් රොබින්, අලම්ගීර්, මොනීර් සහ තවත් අයෙකු පොලීසිය විසින් අත්අඩංගුවට ගෙන තිබෙනවා.
මෙම ඝාතනයේ වැරදිකරුවන්ට දඬුවම් ඉල්ලා පසුගිය රාත්රියේ විශ්වවිද්යාල කිහිපයක සහ දිස්ත්රික්ක කිහිපයක විරෝධතා පවත්වා තිබෙනවා
මෙම රැලිවලදී, ශිෂ්යයන් විසින් BNP පක්ෂයට චෝදනා කර සිටියේ තම නායකයින් සහ ක්රියාකාරීන් පාලනය කිරීමට ඔවුන් අපොහොසත් වී ඇති බවයි.
ශිෂ්ය සම්මේලනයේ සභාපති සයිකට් පැවසුවේ, “හසීනා බලයෙන් පහවීමෙන් පසු, BNP නායකයින් බලය සඳහා එකිනෙකා සමඟ සටන් කරන අතර, එය මෙවැනි ඝාතනවලට හේතු වී තිබෙනවා. වැරදිකරුවන් පක්ෂයෙන් නෙරපා හැරීම පමණක් ප්රමාණවත් නැහැ, ඔවුන්ට නඩු පවරා දඬුවම් දිය යුතුයි” ලෙසයි.
ඩකා විශ්වවිද්යාල පරිශ්රයේ රාජු අනුස්මරණ පිළිරුව අසල ද සෙනසුරාදා විරෝධතා පැවැත්වුණා.
බංග්ලාදේශය තුළ 2024 වසරේ සිට හින්දු සහ අනෙකුත් සුළුතර ප්රජාවන්ට එරෙහි ප්රහාර ඉහළ ගොස් ඇති බවයි වාර්තා වනවා.
මීට පෙර, 2024 අප්රේල් 19 වන දින, බංග්ලාදේශයේ හින්දු නායකයෙකු වූ භාබේශ් චන්ද්ර රෝයි (58) පැහැරගෙන ගොස් පහර දී ඝාතනය කර තිබුණා.
ඔහු බංග්ලාදේශ පූජා උද්යාපන කවුන්සිලයේ බිරාල් ඒකකයේ උපසභාපතිවරයා වූ අතර, හින්දු ප්රජාව අතර ඉහළ පිළිගැනීමක් තිබූ අයෙක් වනවා.
යතුරුපැදි දෙකකින් පැමිණි සිව් දෙනෙකු ඔහුව බලහත්කාරයෙන් නිවසින් රැගෙන ගොස් අසල ගමකදී අමානුෂික ලෙස පහර දී තිබුණා.
2024 අගෝස්තු 5 වන දින, බංග්ලාදේශයේ පැවති දීර්ඝ ශිෂ්ය අරගලයකින් පසුව ෂෙයික් හසීනාගේ රජය පෙරළා දමන ලදී. හසීනාට රට හැර පළා යාමට සිදු වූ අතර, ඉන් අනතුරුව බංග්ලාදේශයේ නීතිය හා සාමය බිඳ වැටුණා.
පාලනයකින් තොර වූ කණ්ඩායම්වල ප්රධාන ඉලක්කය බවට පත්වූයේ සුළුතර ප්රජාවන්, විශේෂයෙන්ම හින්දු ජනතාවයි.
බංග්ලාදේශ හින්දු, බෞද්ධ, ක්රිස්තියානි එකමුතු කවුන්සිලයේ වාර්තාවකට අනුව, 2024 අගෝස්තු 4 සිට 2024 දෙසැම්බර් 31 දක්වා කාලය තුළ වාර්ගික ප්රචණ්ඩ ක්රියා හේතුවෙන් හින්දු ජාතිකයින් 32 දෙනෙකු මියගොස්, ස්ත්රී දූෂණ සහ හිංසනයට ලක්කිරීමේ සිදුවීම් 13 ක් වාර්තා වී ඇති අතර, කෝවිල් 133 කට පමණ පහර දී තිබෙනවා.
