පසුගිය පැය 24 තුළදී පමණක් ගාසා තීරය ඉලක්ක කර ගනිමින් ඊශ්‍රායලය එල්ල කළ ගුවන් ප්‍රහාරයන්ගෙන් සාමාන්‍ය වැසියන් 70ක අධික සංඛ්‍යාවක් ජීවිතක්ෂයට පත්ව තිබෙනවා.
ගාසා තීරයේ මධ්‍යම ප්‍රදේශයේ නුසෙයිරත් සරණාගත කඳවුරට එල්ලවූ ප්‍රහාරයකින් සාමාන්‍ය වැසියන් පස් දෙනෙකු ජීවිතක්ෂයට පත්වූබව අල්ජසීරා පුවත් සේවය සඳහන් කරනවා.
පසුගිය පැය 24 තුළදී ගාසා තීරය ඉලක්ක කර ගනිමින් ඊශ්‍රායලය ගුවන් ප්‍රහාර 34ක් එල්ලකර ඇති බවයි හමාස් සංවිධානය නිවේදනය කරන්නේ.
සාමාන්‍ය වැසියන්ට ඉවත් වී යන ලෙස දැනුම් දී ඇති ප්‍රදේශයන් ඉලක්ක කර ගනිමින් ද ඊශ්‍රායලය අඛණ්ඩව ගුවන් ප්‍රහාර එල්ල කරන බවට මානව හිමිකම් සංවිධාන චෝදනා කරනවා.
ගාසා තීරයේ රෝහල් ඉලක්ක කර ගනිමින් සිදුකරන ප්‍රහාරයන් වහා අත්හිටුවන ලෙසයි ජගත් සංවිධානය පසුගියදා ඊශ්‍රායලයට දැනුම් දුන්නේ.
පසුගිය වසරේ ඔක්තෝම්බර් 7 වනදා සිට මේ දක්වා ඊශ්‍රායල ප්‍රහාරයන්ගෙන් පලස්තීන වැසියන් 45581 දෙනෙකු ජීවිතක්ෂයට පත්ව ඇති අතර තුවාල ලබා ඇති සංඛ්‍යාව එක් ලක්ෂ දහ දහසකට ආසන්නයි.
