ශීත ඍතුව එළඹීමත් සමගම ස්විට්සර්ලන්තයේ සුරීච් නුවර සිට නව ගුවන් සේවාවක (Edelweiss), මංගල ගුවන් යානය (Inaugural Flight) අද (01) දින උදෑසන කටුනායක ගුවන් තොටුපොළ වෙත පැමිණියා.

මෙම ප්‍රථම මංගල ගුවන් ගමන සදහා ඊඩ්ල්වයිස් ගුවන් සේවය විසින් එයාර් බස් A 330 වර්ගයේ ගුවන් යානයක් යොදවා තිබූ අතර ජල ආචාර (Water Salute) පවත්වා පිළිගැනීමට කටුනායක ගුවන් තොටුපොළ බලධාරීන් පියවර ගෙන තිබුණා.

ඒ අනුව ශ්‍රී ලංකා වේලාවෙන් අද උදෑසන 09.20 ට ඊඩ්ල්වයිස් (Edelweiss) ගුවන් සේවයේ WK – 68 මෙම ගුවන් යානය තුළ ව්‍යාපාරික පංතියේ ගුවන් මගීන් 17 දෙනෙකු සහ පිරිමැසුම්දායක පංතියේ ගුවන් මගීන් 221 දෙනෙකු සමග ගුවන් යානා කාර්යය මණ්ඩලය ලෙස තවත් 13 වශයෙන් 251 දෙනෙකු කටුනායක ගුවන් තොටුපොළ වෙත පැමිණ සිටියා.

සුරීච් නුවර සිට ඍජු ගුවන් ගමනක යෙදෙමින් සතියේ සෑම සිකුරාදා දිනකම කටුනායක ගුවන් තොටුපොළ වෙත පැමිණෙන මෙම යානය එදිනම උදෑසන 10.05 ට මාළදිවයිනේ මාළේ නුවර ඔස්සේ ආපසු සූරීන් නුවර බලා කටුනායක ගුවන් තොටුපොළෙන් පිටත්ව යාමට නියමිතයි.

මෙම ගුවන් සේවා යානා එළඹෙන 2025 වසරේ ජනවාරි මස සිට සතියකට දින දෙකක් වශයෙන්, සිකුරාදා සහ ඉරිදා දින වල සුරීච් නුවර සිට කටුනායක ගුවන් තොටුපොළ වෙත පැමිණීමට නියමිතයි.

එසේම මෙම ශීත ඍතු ගුවන් සේවයේ ගුවන් යානා එළඹෙන 2025 වසරේ මැයි මාසය තෙක් ක්‍රියාත්මක කිරීමට නියමිතයි.