එංගලන්ත වයස අවුරුදු 19 පහළ සහ ශ්‍රී ලංකා වයස අවුරුදු 19 පහළ කණ්ඩායම් අතර පැවැත්වෙන දෙවැනි නිල නොවන ටෙස්ට් තරගයේ සිව් වන දිනය අදයි (19).

ඊයේ (18) තරගය නතර කරන විට ශ්‍රී ලංකා කණ්ඩායම සිය දෙවැනි ඉනිම සඳහා කඩුලු 7ක් දැවී ලකුණු 246ක් ලබා සිටියා.

එහිදී ශ්‍රී ලංකා කණ්ඩායම සිය පළමු ඉනිම සඳහා ලකුණු 153ක් ලබා ගත් අතර එංගලන්ත යොවුන් ක්‍රීඩකයෝ ඊට පිළිතුරු ලෙස ලකුණු 477ක් රැස්කළා.

ඒ අනුව ඉනිමක පරාජයෙන් බේරීම සඳහා ශ්‍රී ලංකා ක්‍රීඩකයෝ තවත් ලකුණු 78ක් ලබාගත යුතු වනවා.

එංගලන්ත ඉනිමේදී රොකී ෆ්ලින්ටොෆ් විශේෂ වාර්තාවක් තැබීමට සමත්වුණා.

ඒ එංගලන්ත අවුරුදු 19 පහළ කණ්ඩායම වෙනුවෙන් අඩුම වයසකදී ශතකයක් රැස්කළ ක්‍රීඩකයා බවට පත් වෙමින්.

16 හැවිරිදි රොකී ෆ්ලින්ටොෆ්, එංගලන්තය වෙනුවෙන් සුපිරි දස්කම් පෑ ඇන්ඬෲ ෆ්ලින්ටොෆ් ගේ පුත්‍රයා ද වනවා.