ශ්‍රී ලංකාව ‘ලෝකයේ වඩාත්ම කැමතිම දූපත’ ලෙස තේරී පත් වී තිබෙනවා.

ඒ 23 වැනි වාර්ෂික Wanderlust Reader Travel Awards හිදීයී.

ඒ අනුව සංචාරක සඟරාව වන ‘Wanderlust’ පවසන පරිදි, ශ්‍රී ලංකාව පසුගිය වසරේ අටවැනි ස්ථානයේ සිට ඉහළටම පැමිණ, එම සම්මාන උළෙලේ පෙරළියක් කරමින් රන් පදක්කම ලබා ගැනීමට සමත් වී තිබෙනවා.

මිලියන 3 කට අධික සංචාරකයින් විසින් ඡන්දය ප්‍රකාශ කරන ලද මෙම සම්මානය ශ්‍රී ලංකාවේ ආකර්ශනීය භූ දර්ශන සහ ලොව පුරා සිටින අමුත්තන් වශී කරවන පොහොසත් ඉතිහාසය ඉස්මතු කරනවා.

Wanderlust විසින් ශ්‍රී ලංකාව විස්තර කර ඇත්තේ මෙසේයි…

“ඉන්දියන් සාගරයේ මුතු ඇටය” ලෙසින් හඳුන්වනු ලබන ජාතියේ ඉතිහාසයට ජීවය ලැබෙන්නේ සීගිරි පර්වතය, දඹුල්ලේ ලෙන් විහාර, අනුරාධපුර සහ පොළොන්නරුව පුරාණ නටඹුන් වැනි දර්ශනීය ස්මාරක හරහායි.”

“වෙනත් තැනක, එහි දිවියන්ගෙන් පිරුණු ජාතික වනෝද්‍යාන සහ තංගල්ල සහ ත්‍රිකුණාමලයේ කැලෑවෙන් වැසී ඇති වෙරළ තීරයන් දිවයිනේ ස්වාභාවික පැත්ත පෙන්වයි.”

” මෑතක සිට, තේ වතු සහ මධ්‍යයේ සශ්‍රීක උස්බිම් වලින් සමන්විත Pekoe Trail හි නැවුම් එකතු කිරීමත් සමඟ ශ්‍රී ලංකාවේ හරිත හදවත ගවේෂණය කිරීම සඳහා උද්යෝගිමත් නව මාර්ගයක් ලබා දෙයි”.

මේ අතර අනෙකුත් කාණ්ඩවලදී, ඕස්ට්‍රේලියාව වඩාත් කැමතිම රට ලෙස තේරී පත් වූ අතර, ටෝකියෝ වඩාත් කැමතිම නගරය ලෙස තේරී පත් වී තිබෙනවා.