2024 අගෝස්තු මාසයට අදාළව ජාත්‍යන්තර ක්‍රිකට් කවුන්සිලය විසින් නම් කරන ලද මාසයේ ක්‍රීඩකයා ලෙස ශ්‍රී ලංකා යොවුන් ක්‍රීඩක දුනිත් වෙල්ලාලගේ නම් කර තිබෙනවා.

ඒ පසුගිය අගෝස්තු මාසයේ දී ඉන්දීය ක්‍රිකට් කණ්ඩායම සමග පැවැති තරගාවලියේ දී දුනිත් දැක් වූ දක්ෂතා මුල් කර ගනිමින්.

මාසයේ ක්‍රීඩකයා ලෙස තේරී පත් වීම සඳහා දුනිත් හා තරග වැදි අනෙකුත් ප්‍රතිවාදීන් දෙදෙනා වූයේ දකුණු අප්‍රිකාවේ කේෂව් මහරාජ් සහ බටහිර ඉන්දීය කොදෙව් දූපත්හි ජේඩන් සීල්ස් යන අයයි.

හිටපු ශ්‍රී ලංකා වයස අවුරුදු 19න් පහළ නායකයා වූ වෙල්ලාලගේ ඉකුත් අගෝස්තු මාසයේ දී ජාත්‍යන්තර ක්‍රිකට් දිවියේ විශාල ප්‍රගතියක් පෙන්නුම් කළ අතර, ඔහුගේ දක්ෂතා 1997න් පසු ශ්‍රී ලංකාව පළමු වරට එක්දින තරගාවලියක දී ඉන්දියාව පරාජය කිරීමට මූලික වශයෙන් හේතු වුණා.

මේ අතර 2024 අගෝස්තු මාසයේ ICC කාන්තා ක්‍රීඩිකාව ලෙස හර්ෂිතා මාධවී තේරී පත්වී තිබෙනවා.

පසුගිය ජයග්‍රාහකයින් සිව් දෙනාගෙන් තිදෙනෙකුම ශ්‍රී ලංකාවෙන් තේරී පත් වීම විශේෂත්වයක් වන අතර, මැයි සහ ජූලි යන මාස දෙකේදීම එම සම්මානය හිමිකර ගැනීමට චමරි අතපත්තු සමත් වුණා.