දකුණු ඉන්දියාවේ ආන්ද්‍ර ප්‍රදේශ් ප්‍රාන්තයේ AI දත්ත මධ්‍යස්ථානයක් ඉදිකිරීම සඳහා ගූගල් හි මව් සමාගම වන ඇල්ෆාබෙට්, ඩොලර් බිලියන 15ක් ආයෝජනය කිරීමට නියමිතයි.

වරාය නගරයක් වන විශාකාපට්නම් හි පිහිටුවන මෙම මධ්‍යස්ථානය, රටවල් 12ක් පුරා පැතිරී ඇති ගූගල් හි ගෝලීය AI මධ්‍යස්ථාන ජාලයේ කොටසක් වනු ඇති.

“එය එක්සත් ජනපදයෙන් පිටත ලෝකයේ ඕනෑම තැනක ආයෝජනය කිරීමට යන විශාලතම AI මධ්‍යස්ථානයයි,” යනුවෙන් ගූගල් ක්ලවුඩ් හි ප්‍රධාන විධායක නිලධාරී තෝමස් කුරියන් දිල්ලියේ ඊයේ පැවති උත්සවයකදී පැවසුවා.

ඉදිරි වසර පහ තුළ ඔවුන් ආයෝජනය ව්‍යාප්ත කරනු ඇති.

මෙම නිවේදනය නිකුත් වන්නේ අමෙරිකානු ජනාධිපති ඩොනල්ඩ් ට්‍රම්ප් අමෙරිකානු සමාගම්වලින් දේශීය ආයෝජන සඳහා ප්‍රමුඛත්වය දෙන ලෙස ඉල්ලා සිටින අවස්ථාවකයි.

ඉන්දියාව AI දත්ත මධ්‍යස්ථාන සඳහා ප්‍රධාන ගමනාන්තයක් ලෙස මතු වී තිබෙනවා.

රටේ අඩු දත්ත පිරිවැය සහ වේගයෙන් වර්ධනය වන අන්තර්ජාල පරිශීලක පදනම එය තාක්ෂණික දැවැන්තයන් සඳහා ක්ලවුඩ් සහ AI ව්‍යාප්තිය සඳහා මධ්‍යස්ථානයක් බවට පත් කර තිබෙනෙවා.

ඇල්ෆාබෙට් ප්‍රධාන විධායක නිලධාරී සුන්දර් පිචායි පැවසුවේ මෙම මධ්‍යස්ථානය කර්මාන්තයේ ප්‍රමුඛ තාක්‍ෂණය ඉන්දියාවේ ව්‍යවසායන් සහ පරිශීලකයන් වෙත ගෙන එනු ඇති අතර, AI නවෝත්පාදනය වේගවත් කර රට පුරා වර්ධනයට දායක වන බවයි.

ව්‍යාපෘතිය අවසන් කිරීම සඳහා විධිමත් ගිවිසුමක් අත්සන් කරන බව ආන්ද්‍ර ප්‍රදේශ් රජය පැවසුවා.

“එය අපගේ ප්‍රාන්තයේ ඩිජිටල් අනාගතය, නවෝත්පාදනය සහ ගෝලීය තත්ත්වය සඳහා දැවැන්ත පිම්මක්” යැයි ප්‍රාන්ත තාක්ෂණ අමාත්‍ය නාරා ලෝකේෂ් සඳහන් කළා.

මෙම ව්‍යාපෘතිය ක්ලවුඩ් සහ AI යටිතල පහසුකම් පුනර්ජනනීය බලශක්ති පද්ධති සහ පුළුල් කරන ලද ෆයිබර් ඔප්ටික් ජාලයක් සමඟ ඒකාබද්ධ කරනු ඇති.

බ්ලූම්බර්ග් ප්‍රවෘත්තිවලට අනුව, මෙම ව්‍යාපෘතිය 2029 වන විට 6GW දත්ත මධ්‍යස්ථාන ධාරිතාවක් සංවර්ධනය කිරීමේ ආන්ද්‍ර ප්‍රදේශ් රජයේ සැලැස්මේ කොටසක් වනවා.

දත්ත මධ්‍යස්ථාන යනු දත්ත රැස් කිරීමට, සැකසීමට, ගබඩා කිරීමට සහ බෙදා හැරීමට සංවිධාන භාවිත කරන පරිගණක සහ ජාලකරණ උපකරණ තැන්පත් කරන භෞතික මධ්‍යස්ථාන වනවා.

සේවාදායකයන්, ගබඩා පද්ධති, රවුටර සහ ෆයර්වෝල් වැනි ජාල උපකරණ මෙන්ම ඒවා ක්‍රියාත්මක කිරීමට අවශ්‍ය බලය සහ සිසිලන පද්ධති ඒවායේ අඩංගු වනවා.

ආන්ද්‍ර ප්‍රදේශ්හි, රජය ගෝලීය ආයෝජකයන් ආකර්ෂණය කර ගැනීම සඳහා ඉඩම් සහ විදුලිය සහන මට්ටමින් ලබා දී තිබෙනවා.

ගෝලීය වෘත්තීය සේවා සමාගමක් වන JLL හි India Data Centre Market Dynamics 2024 වාර්තාවට අනුව, ඉන්දියාවේ දත්ත මධ්‍යස්ථාන කර්මාන්තය පසුගිය වසර පහ තුළ වේගයෙන් වර්ධනය වී ඇති අතර, 2024 දී 1GW ධාරිතා සීමාව ඉක්මවා ගොස් 2019 මට්ටම තුන් ගුණයකින් පමණ වැඩි වී තිබෙනවා.