අමෙරිකාවේ ප්රකට ගායකයෙකු වන D4vd (ඩේවිඩ් ඇන්තනී බර්ක්) හට ලියාපදිංචි කර ඇති ටෙස්ලා වර්ගයේ මෝටර් රථයක පිටුපස කුටියේ තිබී දිරාපත් වූ මළ සිරුරක් පසුගිය සැප්තැම්බර් මස 8 වන දින ලොස් ඇන්ජලීස් හිදී සොයාගෙන තිබෙනවා.
මෙලෙස මියගොස් ඇත්තේ මාස කිහිපයක් තිස්සේ අතුරුදන්ව සිටි 15 හැවිරිදි සෙලෙස්ටේ රිවාස් හර්නැන්ඩස් නම් දැරිය බවටයි හඳුනාගෙන ඇත්තේ.
ප්ලාස්ටික් බෑගයක ඔතා තිබූ ඇයගේ සිරුර සොයාගන්නා විට සති කිහිපයක් පුරා දිරාපත් වෙමින් පැවති බවට බලධාරීන් විශ්වාසය පළ කරනවා.
හොලිවුඩ් වීදියක දින ගණනාවක් තිස්සේ අතහැර දමා තිබීම හේතුවෙන් ඇදගෙන ගොස් රථගාලක නවතා තිබූ මෙම මෝටර් රථයෙන් හමා ආ දැඩි දුර්ගන්ධයක් පිළිබඳව ලද පැමිණිල්ලක් මත සිදුකළ පරීක්ෂාවකදී සෙලෙස්ටේගේ මළ සිරුර සොයාගෙන තිබුණා.
ප්රදේශවාසීන්ගේ පැමිණිලි ලැබීමට තරම් ප්රමාණවත් කාලයක් එම මෝටර් රථය එකම ස්ථානයේ නවතා තිබී ඇති අතර, සිරුර සොයා ගැනීමට දින කිහිපයකට පෙර රථවාහන නීති උල්ලංඝනය කිරීම සම්බන්ධයෙන් එයට දඩ පත්රිකා ද නිකුත් කර තිබුණ බව සඳහන්.
මෙම මරණයට නිශ්චිත හේතුව සහ එය සිදුවූ ආකාරය මෙතෙක් නිශ්චය කරගෙන නොමැති වුවද, විශේෂයෙන්ම මළ සිරුර සඟවා තැබීම සම්බන්ධයෙන් අපරාධ වගකීමක් පැවතිය හැකිද යන්න පිළිබඳව පොලිසිය පරීක්ෂණ පවත්වනවා.
මිය යන විට සෙලෙස්ටේ අඩි 5 අඟල් 2ක් පමණ උස, රාත්තල් 71ක් බරැති තැනැත්තියක බවට විශ්වාස කෙරෙන අතර, ඇය ටියුබ් ටොප් වර්ගයේ උඩුකය ඇඳුමකින් සහ කලු පැහැති කලිසමකින් සැරසී සිට තිබෙනවා.
එමෙන්ම ඇයගේ ඇඟිල්ලක “Shhh…” යනුවෙන් පච්චයක් කොටා තිබූ බවද සඳහන් වනවා.
මෙම සිදුවීම වන විට ගායක D4vd සංගීත ප්රසංග චාරිකාවක නිරතව සිට ඇති අතර ඔහු බලධාරීන් සමඟ සහයෝගයෙන් කටයුතු කරන බවයි වාර්තා වන්නේ.
මේ මොහොත වන විට මරණයට සෘජුව සම්බන්ධ කරන කිසිදු ප්රසිද්ධ සාක්ෂියක් අනාවරණය වී නැහැ.
ලොස් ඇන්ජලීස් පොලිස් දෙපාර්තමේන්තුවේ මංකොල්ලකෑම් සහ මිනීමැරුම් විමර්ශන අංශය විසින් මෙම සිද්ධිය සම්බන්ධයෙන් විමර්ශන මෙහෙයවනු ලබනවා.
ඔවුන් සෙලෙස්ටේගේ අවසන් දින කිහිපය ප්රතිනිර්මාණය කිරීමටත්, ගායකයා හෝ මෝටර් රථයට ප්රවේශ වන්නට ඇතැයි සැකකෙරෙන වෙනත් පුද්ගලයින් සමඟ ඇයගේ පැවති සබඳතා සොයා බැලීමටත් උත්සාහ දරමින් සිටිනවා.
2025 ඔක්තෝබර් මස 1 වන දින වන විට මෙම සිද්ධිය සම්බන්ධයෙන් කිසිදු අත්අඩංගුවට ගැනීමක් සිදුකර නොමැති අතර, මරණයට හේතුව සහ ඒ හා සම්බන්ධ ඕනෑම අපරාධ වගකීමක් පිළිබඳව නීතිය ක්රියාත්මක කරන ආයතන තවදුරටත් පිළිතුරු සොයමින් සිටින සක්රීය හා සංකීර්ණ විමර්ශනයක් ලෙස මෙය පවතින බවයි විදෙස් මාධ්ය වාර්තා පවසන්නේ.
