පාකිස්තානයේ විශාලතම නගරය වන කරච්චි නගරාසන්නයේදී සංක්රාන්ති සමාජභාවීය කාන්තාවන් තිදෙනෙකු වෙඩි තබා ඝාතනය කර ඇති බව එරට පොලීසිය පවසනවා.
මෙම ඝාතන මඟින් රට පුරා එම ප්රජාව මුහුණ දෙන දැඩි අනාරක්ෂිතභාවය යළිත් වරක් ඉස්මතු කර දක්වන බවයි වාර්තා වන්නේ.
මෙම කාන්තාවන් තිදෙනාගේ මළ සිරුරු ඉරිදා දිනයේදී මාර්ගයක් අසල තිබී සොයාගෙන තිබුණා.
ජ්යෙෂ්ඨ පොලිස් නිලධාරී ජාවෙඩ් අබ්රෝ පැවසුවේ ඔවුන් තිදෙනාටම ඉතා ආසන්නයේ සිට වෙඩි තබා ඇති බවත්, පසුව මළ සිරුරු ප්රාදේශීය සුසාන භූමියක මිහිදන් කළ බවයි.
ඝාතනයට හේතුව මෙතෙක් අනාවරණය වී නොමැති අතර, ඝාතකයින් සොයා අත්අඩංගුවට ගැනීම සඳහා පුළුල් මෙහෙයුමක් ක්රියාත්මක බව ද ඔහු සඳහන් කළා.
මෙම ඝාතන හෙළා දුටු සින්ද් පළාත් මහ ඇමති මුරාද් අලී ෂා, සිද්ධිය සම්බන්ධයෙන් පරීක්ෂණයක් පවත්වන ලෙස නියෝග කර තිබෙනවා.
මුස්ලිම් බහුතරයක් වෙසෙන පාකිස්තානයේ සංක්රාන්ති සමාජභාවීය ප්රජාව නිරන්තරයෙන් අපයෝජනයට ලක්වන අතර, ඊනියා “ගෞරවය රැකගැනීමේ ඝාතන” ලෙස හැඳින්වෙන, ලිංගික අපගමනයන් ලෙස සලකන ක්රියා සඳහා ඥාතීන් විසින් සිදුකරන මනුෂ්ය ඝාතනවලට ද ඔවුන් ගොදුරු වනවා.
පාකිස්තාන ශ්රේෂ්ඨාධිකරණය සංක්රාන්ති සමාජභාවීය පුද්ගලයින් තෙවන ලිංගිකත්වය ලෙස පිළිගෙන ඔවුන්ට නෛතික ආරක්ෂාව ලබාදී තිබුණ ද, සමාජයේ ඔවුන්ට එරෙහි වෙනස් කොට සැලකීම් තවමත් බහුලව පවතිනවා.
ඔවුන්ගේ මූලික අයිතිවාසිකම් සුරක්ෂිත කිරීම සඳහා 2018 වසරේදී පාකිස්තාන පාර්ලිමේන්තුව නීතියක් සම්මත කළ ද, සමාජ අපකීර්තිය සහ ප්රචණ්ඩත්වය තවමත් පහව ගොස් නොමැති බව ක්රියාකාරීහු පෙන්වා දෙනවා.
මළ සිරුරු මරණ පරීක්ෂණය සඳහා රැගෙන ගිය කරච්චි නුවර රජයේ ජින්නා රෝහල ඉදිරිපිට සංක්රාන්ති සමාජභාවීය ප්රජාවේ සාමාජිකයින් ඉරිදා විරෝධතාවක් පැවැත්වූවා.
ඝාතකයින් නීතිය හමුවට නොපැමිණවුවහොත් දීපව්යාප්ත විරෝධතා මාලාවක් දියත් කරන බවට ඔවුහු එහිදී අනතුරු අඟවා තිබෙනවා.
සංක්රාන්ති සමාජභාවීය අයිතිවාසිකම් ක්රියාකාරිනියක වන බින්දියා රානා සඳුදා ප්රකාශ කළේ තම ප්රජාවට එරෙහි ප්රචණ්ඩත්වය “අලුත් දෙයක් නොවන අතර එය අප සමාජය තුළ ගැඹුරට මුල් බැස ඇති” බවයි. ඝාතකයින් හඳුනාගැනීමට පොලීසිය අපොහොසත් වුවහොත් රටපුරා විරෝධතාවක් ප්රකාශයට පත් කරන බවයි.
“ජෙන්ඩර් ඉන්ටරැක්ටිව් එලායන්ස්” නම් දේශීය හිමිකම් කණ්ඩායම, ඝාතනයට ලක්වූවන් සිඟමන් යැදීමෙන් ජීවිකාව ගෙන ගිය කරච්චි නුවර පදිංචිකරුවන් ලෙස හඳුනාගෙන තිබෙනවා.
දින දෙකකට පෙර කරච්චියේ “සී වීව්” වෙරළ තීරයේදී තවත් සංක්රාන්ති සමාජභාවීය කාන්තාවකට පිහියකින් පහර දී බරපතල තුවාල සිදුකිරීමේ සිද්ධියක් පිළිබඳව ද එම සංවිධානය අවධානය යොමු කළා.
එම සංවිධානයට අනුව, “මෙම අනුප්රාප්තික ඛේදවාචක මගින් පෙන්නුම් කරන්නේ මෙම ප්රජාව ක්රමානුකූලව ඉලක්ක කර ඇති බවයි.
මෙය හුදෙක් පුද්ගල ඝාතන පිළිබඳ කාරණයක් පමණක් නොව, සමස්ත ප්රජාවක්ම භීතියට පත්කර නිහඬ කිරීමට දරන උත්සාහයකි.” ඝාතකයින් වහාම අත්අඩංගුවට ගන්නා ලෙසත්, සංක්රාන්ති සමාජභාවීය පුද්ගලයින් සඳහා විශේෂිත ආරක්ෂක ඒකකයක් ස්ථාපිත කරන ලෙසත්, සිවිල් සමාජයෙන් වැඩි සහයෝගයක් ලබාදෙන ලෙසත් එම සංවිධානය ඉල්ලා සිටිනවා.
