රුසියාව සහ යුරෝපය අතර නෝර්ඩ් ස්ට්රීම් ගෑස් නල මාර්ග කඩාකප්පල් කළ 2022 ද්විත්ව පිපිරීම්වලට සම්බන්ධ බවට සැකපිට ජර්මනියෙන් යුරෝපීය වරෙන්තුවක් මත අත්අඩංගුවට ගත් පුද්ගලයෙකු තමන් වෙත එල්ලවන චෝදනා ප්රතික්ෂේප කර තිබෙනවා.
ඒ අනුව පිපිරීම් සිදුවන අවස්ථාවේ ඔහු යුක්රේනයේ සිටි බවයි ඔහු පවසා ඇත්තේ.
ඔහු බොලොග්නා අභියාචනාධිකරණයෙන් පිටත ස්ථානගත කර සිටි මාධ්යවේදීන් සහ ඡායාරූප ශිල්පීන් අමතමින්, සෙහ්රි කුස්නෙට්සොව්, උසාවියේ මළුවේදී, ඇඟිලි තුනක් ඔසවා, “යුක්රේන ත්රිශූල” ලකුණක් ද පෙන්වා සිටියා.
මෙය යුක්රේන ලාංඡනයේ දැක්වෙන ජාතික අනන්යතාවයේ සලකුණක් වනවා.
පසුව 49 හැවිරිදි පුද්ගලයා බන්ධනාගාර දෙපාර්තමේන්තුව විසින් අධිකරණ ශාලාවට කැඳවාගෙන යන ලද අතර එහිදී නෝර්ඩ් ස්ට්රීම් ගෑස් නල මාර්ග කඩාකප්පල් කිරීමට සම්බන්ධ වීම සඳහා යුරෝපීය අත්අඩංගුවට ගැනීමේ වරෙන්තුව වලංගු කිරීම ගැන විමසා සිටියා.
අධිකරණ ශාලාවේ ඉංග්රීසි පරිවර්තකයෙකු සිටි නමුත් අත්අඩංගුවට ගත් පුද්ගලයා කියා සිටියේ තමාට ඉංග්රීසි භාෂාව චතුර ලෙස දැනගත නොහැකි බවත් යුක්රේන හෝ රුසියානු පරිවර්තකයෙකු ඉල්ලා සිටින බවයි.
එබැවින් විනිසුරුවරයා එවැනි පරිවර්තකයෙකු සෙවීමට ඉල්ලා සිටි අතර, නඩු විභාගය කල් තබනු ලැබුවා.
කෙසේවෙතත් යුක්රේන පරිවර්තකයෙකු සොයා ගැනීම සඳහා නඩු විභාගය දහවල් වන තෙක් කල් තැබීමටයි අධිකරණයට සිදු වුණේ.
ඒ අනුව කුස්නෙට්සොව් වෙනුවෙන් පැවැත්වෙන නඩු විභාගයට පෙර, බොලොග්නා අභිචෝදක කාර්යාලය දැනටමත් නඩු විභාගයට පෙර රඳවා තබා ගැනීම සඳහා ලිඛිත ඉල්ලීමක් ඉදිරිපත් කර තිබෙනවා.
බෝල්ටික් මුහුදේ නෝර්ඩ් ස්ට්රීම් ගෑස් නල මාර්ග ත්රස්තවාදී කඩාකප්පල් කිරීම සම්බන්ධයෙන් යුක්රේන ජාතිකයාට චෝදනා එල්ල වී ඇති අතර රිමිනි අසළ සැන් ක්ලෙමෙන්ටේ හි ගොවිපල නිවාඩු නිකේතනයක දී ඊයේ රාත්රියේ ජර්මානු ෆෙඩරල් අධිකරණය විසින් නිකුත් කරන ලද යුරෝපීය අත්අඩංගුවට ගැනීමේ වරෙන්තුවක් මත ඔහුව අත්අඩංගුවට ගෙන තිබෙනවා.
එබැවින් නියෝජ්ය අභිචෝදක ලිසියා ස්කැග්ලියාරිනි විසින් සැකකරු යටත් වීම සඳහා ජර්මානු අධිකරණ බලධාරීන්ගේ ඉල්ලීම්වලට අවසර දී තිබෙනවා.
