ඊශ්රායලය සමඟ පැවති දින 12ක ගැටුම්කාරී තත්ත්වයෙන් අනතුරුව ඉරානයේ රන් සඳහා වූ ඉල්ලුම වාර්තාගත ලෙස ඉහළ ගොස් ඇති බව ලෝක රන් කවුන්සිලය (World Gold Council) විසින් බ්රහස්පතින්දා නිකුත් කරන ලද වාර්තාවක දැක්වෙනවා.
ඒ ලෝකයේ සෙසු රටවල රත්රන් සඳහා වූ ඉල්ලුම අඩු වෙමින් පවතින පසුබිමක් තුළයි.
ඉරානය තුළ රත්රන් මිල ගණන් ඉහළ ගොස් ඇති අවස්ථාවක මෙම ප්රවණතාවය දක්නට ලැබීම විශේෂත්වයක්.
පසුගිය වසරේ එම කාර්තුවට සාපේක්ෂව මෙම වසරේ දෙවන කාර්තුවේදී ඉරානයේ සමස්ත රන් විකුණුම් පරිමාව සියයට 20කින් වර්ධනය වී ඇති බව එම වාර්තාව පෙන්වා දෙනවා.
තවද, ඉරානයේ රන් කාසි සහ රන් සඳහා වන ඉල්ලුම වසර හයකට පසු ඉහළම මට්ටමට පැමිණ ඇති බවද ලෝක රන් කවුන්සිලය සඳහන් කරනවා.
කෙසේ වෙතත්, ගෝලීය වශයෙන් රන් කාසි සහ රන් භාණ්ඩ සඳහා වන ඉල්ලුම වසරේ දෙවන කාර්තුවේදී, ඊට පෙර පැවති මාස තුනට සාපේක්ෂව සියයට හයකින් පහත වැටී තිබෙනවා.
ලෝක රන් කවුන්සිලයේ විශ්ලේෂිකාවක වන ලුවීස් ස්ට්රීට් පවසන්නේ ඉරානයේ තත්ත්වය හාත්පසින්ම වෙනස් බවයි.
ඉරාන පාරිභෝගිකයින් ආයෝජන මාර්ගයක් ලෙස රන් ආභරණ මිලදී ගැනීමට නැඹුරු වීම හේතුවෙන්, කාර්තුව තුළ එරට ආභරණ සඳහා වූ ඉල්ලුම පෙර වසරට සාපේක්ෂව සියයට 12කින් ඉහළ ගොස් තිබෙනවා.
මෙම කාලසීමාව තුළ ලොව පුරා රන් ආභරණ සඳහා වූ ඉල්ලුම සියයට 14කින් පහත වැටී ඇති අතර, එහිදී මිලදී ගැනීම්වල වටිනාකම සියයට 21කින් ඉහළ ගොස් තිබෙනු දක්නට හැකියි.
ගෝලීය ආර්ථික අවිනිශ්චිතතාවය හමුවේ පාරිභෝගිකයින් සුරක්ෂිත ආයෝජනයක් ලෙස රත්රන් වෙත යොමු වෙමින්, ඒ සඳහා තම අයවැය පුළුල් කරමින් සිටින බව ලුවීස් ස්ට්රීට් වැඩිදුරටත් සඳහන්.
අමෙරිකානු තීරුබදු ඉල්ලීම් සහ භූ දේශපාලනික ආතතීන් හේතුවෙන් වසරේ පළමු කාර්තුවේදී ඉහළ මට්ටමක පැවති රත්රන් මිල, අප්රේල්-ජුනි කාර්තුව තුළදී ද ආයෝජනයක් ලෙස සිය වටිනාකම රඳවාගෙන ඇති බවයි ඇය පෙන්වා දෙන්නේ.
