කොළඹ කොටුවේ ක්‍රිෂ් ගොඩනැගිල්ලේ අනතුරුදායක කොටස් සති දෙකක් ඇතුළත ඉවත් කරන ලෙස කොටුව මහේස්ත්‍රාත් අධිකරණය එම සමාගමේ අධ්‍යක්ෂ මණ්ඩලයට ඊයේ (06) නියෝග කළා.
කොළඹ කොටුව ඉදිකිරීම් අතහැර දමා ඇති මහල් 60 කින් යුත් ක්‍රිෂ් ගොඩනැගිල්ලෙන් ඇතැම් කොටස් පසුගිය දිනවල බිමට පතිත වී තිබුණා.
ඊට එරෙහිව කොටුව පොලිසිය, අධිකරණය හමුවේ නඩු පැවරීමට ද කටයුතු කෙරුණා.
ඒ අනුව කොටුව මහේස්ත්‍රාත් තනුජා ලක්මාලි මහත්මිය කොන්දේසි සහිත ආඥාවක් නිකුත් කරමින් කියා සිටියේ මහජන පීඩාවක් නොවන අයුරින් මෙම ගොඩනැගිල්ල පවත්වාගෙන යා යුතු බවයි.
පහතට වැටෙන සහ වැටිය හැකි අබලි ද්‍රව්‍ය ඇත්නම් ඒවා සති දෙකක් තුළ ඉවත් කළ යුතු බව නියෝගයේ සඳහන්.
ක්‍රිෂ් සමාගම වෙනුවෙන් පෙනීසිටි නීතිඥවරුන් කියාසිටියේ දින 55 තුළ එම කොටස් ඉවත් කිරීමේ වැඩපිළිවෙලක් සකස් කර ඇති බවයි.
එතරම් කාලයක් ගැනීම නුසුදුසු බව කොටුව පොලිස් ස්ථානාධිපති ලක්මාල් විජේරත්න ප්‍රකාශ කළා.
ඒ අනුව සති දෙකක් තුළ එම ද්‍රව්‍ය ඉවත් කිරීමට නියෝග කෙරුණා.
