ඊශ්‍රායලයේ අගමැති සහ හිටපු ආරක්ෂක අමාත්‍යවරයා මෙන්ම හමාස් හමුදාපතිවරයාට ජාත්‍යන්තර අපරාධ අධිකරණය (ICC) අත්අඩංගුවට ගැනීමේ වරෙන්තු නිකුත් කර තිබෙනවා.

මේ සම්බන්ධයෙන් කළ පූර්ව නඩු විභාගයකදී ජාත්‍යන්තර අපරාධ අධිකරණයේ අධිකරණ බලයට ඊශ්‍රායලය අභියෝග කර තිබුණා.

නමුත් එය ප්‍රතික්ෂේප කරමින් ජාත්‍යන්තර අපරාධ අධිකරණය බෙන්ජමින් නෙතන්යාහු සහ යෝව් ගැලන්ට් සඳහා වරෙන්තු නිකුත් කර ඇති බව සඳහන්.

මේ අතර හමාස් සංවිධානයේ හමුදාපතිවරයාවන මොහොමඩ් ඩීෆ්ට ද වරෙන්තුවක් නිකුත් කර ඇතත්, ඔහු ජූලි මාසයේදී ගාසා තීරයේ ගුවන් ප්‍රහාරයකින් මිය ගිය බව ඊශ්‍රායලය පවසනවා.

ඊශ්‍රායලය සහ හමාස් අතර පැවති යුද්ධයේදී සිදු වූ බව කියන යුද අපරාධ සහ මනුෂ්‍යත්වයට එරෙහි අපරාධ සම්බන්ධයෙන් “සාපරාධී වගකීම” මෙම පුද්ගලයන් තිදෙනා සතු බවට “සාධාරණ හේතු” ඇති බවයි විනිසුරුවරු පවසා ඇත්තේ.

නමුත් ඊශ්‍රායලය සහ හමාස් සංවිධානය එම චෝදනා ප්‍රතික්ෂේප කර තිබෙනවා.

අගමැති නෙතන්යාහු ICC යේ තීරණය ලෙස හෙළා දකින අතර හමාස් සංවිධානය පවසා ඇත්තේ නෙතන්යාහු සහ ගැලන්ට් සඳහා වූ වරෙන්තු “වැදගත් ඓතිහාසික පූර්වාදර්ශයක්” තබා ඇති බවයි.

මෙම වරෙන්තු වල බලපෑම අර්ධ වශයෙන් රඳා පවතින්නේ ICC හි සාමාජික රටවල් 124 ඒවා බලාත්මක කිරීමට හෝ නොකිරීමට තීරණය කරන්නේද නැද්ද යන්න මතයි.

එම සාමාජික රටවලට ඊශ්‍රායලය හෝ එහි ප්‍රධාන මිතුරා වන අමෙරිකා එක්සත් ජනපදය ඇතුළත් වන්නේ නැහැ.

ධවල මන්දිරය පවසා ඇත්තේ අමෙරිකා එක්සත් ජනපදය ICC තීරණය ප්‍රතික්ෂේප කරන බවයි.

කෙසේ වෙතත්, යුරෝපා රටවල් කිහිපයක් අධිකරණයේ තීන්දුවලට ගරු කරන බව පවසා තිබෙනවා.