කළුතර සිට මරදාන බලා ධාවනය වීමට නියමිතව තිබූ දුම්රියේ එංජිම කළුතර දුම්රිය ස්ථානය ආසන්නයේ දී ගිනිගැනීමට ලක්වීම හේතුවෙන් මුහුදුබඩ මාර්ගයේ දුම්රිය ධාවනයට බාධා එල්ල වී තිබෙනවා.
අද (15) පෙරවරු 7ට කළුතර සිට ගමන් ආරම්භ කළ දුම්රිය කළුතර දුම්රිය ස්ථානය ආසන්නයේ දී මෙලෙස ගිනිගැනීමට ලක්ව ඇති බවයි දුම්රිය දෙපාර්තමේන්තුව පැවසුවේ.
දුම්රියේ පිටුපස එංජිමේ ගින්න හටගෙන ඇති අතර කළුතර මහ නගර සභාවේ ගිනිනිවීමේ ඒකකය විසින් ගින්න මැඩපවත්වා තිබෙනවා.
ගින්නට හේතුව මෙතෙක් අනාවරණය වී නොමැති අතර එම දුම්රිය අවලංගු කර ඇති බව දුම්රිය දෙපාර්තමේන්තුව පැවසුවා.
කෙසේවෙතත් අදාළ දුම්රියේ සිටි මගීන් වෙනත් දුම්රියකින් මරදාන දක්වා රැගෙන ඒමට කටයුතු කර ඇති අතර මේ හේතුවෙන් මුහුදුබඩ මාර්ගයේ සුළු දුම්රිය ප්‍රමාදයක් සිදුවනු ඇති බව එම දෙපාර්තමේන්තුව වැඩිදුරටත් සඳහන් කළා.
