ඉරානයේ උත්තරීතර නායක Ali Khameneiගේ ඝාතනයෙන් පසුව එම ධුරයේ වගකීම් තාවකාලිකව භාරගැනීම සඳහා නව නායකයෙකු පත්කර ඇති බව විදෙස් මාධ්‍ය වාර්තා කරයි.
ඒ අනුව ෂියා ආගමික නායකයෙකු වන Alireza Arafi නව කවුන්සිලයේ ප්‍රධානියා ලෙස පත්කර ඇති බව සඳහන් වේ. එම කවුන්සිලයේ අනෙකුත් සාමාජිකයින් අතර ඉරාන ජනාධිපති Masoud Pezeshkian ද ඇතුළත් බවද වාර්තා වෙයි.
ඉරාන උත්තරීතර නායක අලි කමේනි මියගියේ ටෙහෙරාන් නගරයේ පිහිටි ඔහුගේ කාර්යාලය ඉලක්ක කර එල්ල වූ ප්‍රහාරයකින් බව ඉරාන මාධ්‍ය සඳහන් කරයි. එම ප්‍රහාරයෙන් අනතුරුව ඔහුගේ දේහය කාර්යාල ගොඩනැගිල්ලේ සුන්බුන් අතර තිබියදී සොයාගත් බවද වාර්තා වේ.
මෙම සිද්ධියෙන් අනතුරුව ඉරානය තුළ දින 40ක ජාතික ශෝක කාලයක් ප්‍රකාශයට පත්කර ඇත.
1989 වසරේ සිට දශක තුනකට වැඩි කාලයක් ඉරානයේ බලය දරා සිටි 86 හැවිරිදි කමේනි, රටේ උත්තරීතර නායකයා ලෙස පමණක් නොව රාජ්‍ය ප්‍රධානියා සහ සියලු හමුදා බලකායන්ගේ ප්‍රධානියා ලෙසද කටයුතු කළේය.
1979දී සිදු වූ Iranian Revolution අනුව එවකට පාලනය කළ ෂා රජුගේ ආණ්ඩුව පෙරළා දමමින් Ruhollah Khomeini බලයට පත්වූ අතර, ඔහුගෙන් පසුව අලි කමේනි එම ධුරය භාරගත්තේය.
කමේනිගේ මරණයෙන් පසුව කලාපයේ ආරක්ෂක තත්ත්වය තවදුරටත් උණුසුම් වී ඇති අතර ඊශ්‍රායලය සහ ඇමෙරිකාව එක්ව එල්ල කළ ප්‍රහාරවලට ප්‍රතිචාර වශයෙන් ඉරානය විසින් මැදපෙරදිග රටවල පිහිටි ඇමරිකානු හමුදා කඳවුරු ඉලක්ක කර ප්‍රහාර කිහිපයක් දියත් කළ බව වාර්තා වේ.
එම ප්‍රහාර මාලාවෙන් සමස්ත මැදපෙරදිග කලාපයේ ආරක්ෂක තත්ත්වය දැඩි ලෙස උණුසුම් වී ඇත. Donald Trump ප්‍රකාශ කර ඇත්තේ ඉරානය තවදුරටත් ප්‍රහාර එල්ල කළහොත් ඊට දැඩි ප්‍රතිචාර දක්වන බවයි.
මේ අතර ඊශ්‍රායලය විසින් සිදුකළ ප්‍රහාර මෙහෙයුම “Operation Roaring Lion” ලෙස නම් කර තිබේ. එම ප්‍රහාරයන් ඉරානයේ Isfahan, Qom, Karaj සහ Kermanshah ඇතුළු නගර කිහිපයක් ඉලක්ක කර සිදු කර ඇත.
ඊට ප්‍රතිචාර ලෙස ඉරානය විසින් ඊශ්‍රායලය දෙසට මිසයිල ප්‍රහාර දියත් කළද, එරට සතු Iron Dome ගුවන් ආරක්ෂක පද්ධතිය මගින් බොහෝ ප්‍රහාර වළක්වා ගැනීමට හැකි වූ බව වාර්තා වේ.
මෙම ප්‍රහාරවලින් ඉරාන හමුදා ප්‍රධානීන් 40කට අධික පිරිසක් මියගොස් ඇති අතර, එම අතරට ආරක්ෂක අමාත්‍යවරයා, හමුදා මාණ්ඩලික ප්‍රධානියා සහ Islamic Revolutionary Guard Corps හි නායකයාද ඇතුළත් බව සඳහන් වේ.
ඉරාන මාධ්‍ය අනුව කමේනිගේ පවුලේ සාමාජිකයින් කිහිප දෙනෙකු ද මෙම ප්‍රහාරවලින් ජීවිතක්ෂයට පත්ව ඇත.
ඉරාන රතු අඩසඳ සංවිධානය සඳහන් කරන්නේ මෙතෙක් සිදු වූ ප්‍රහාරවලින් පුද්ගලයින් 200කට වැඩි පිරිසක් මියගොස් ඇති බවයි. එම මරණ අතරින් 100කට අධික පිරිසක් වාර්තා වී ඇත්තේ කාන්තා පාසලකට එල්ල වූ ප්‍රහාරයකින් බවද සඳහන් වේ.
කමේනිගේ අභාවයෙන් පසු රටේ අන්තර්වාර පාලනය සඳහා ජනාධිපති මසූද් පෙෂෙෂ්කියන්, අධිකරණ ප්‍රධානියා සහ විනිසුරුවරයෙකු ඇතුළත් කමිටුවක් පත් කර ඇත.
සාමාජිකයින් 88 දෙනෙකුගෙන් සමන්විත “නායකත්ව ප්‍රවීණයන්ගේ සමුළුව” මගින් ඉරානයේ මීළඟ ආධ්‍යාත්මික නායකයා ඉක්මනින් පත්කරනු ඇති බව වාර්තා වේ.
මේ අතර සිය නායකයාගේ ඝාතනයට වගකිව යුතු රටවල්වලට එරෙහිව ප්‍රතිචාර දක්වන බව ඉරානය අවධාරණය කර ඇති අතර එය රටේ නීත්‍යානුකූල අයිතියක් බවද ජනාධිපති මසූද් පෙෂෙෂ්කියන් ප්‍රකාශ කර තිබේ.