ලිබියාවේ ජාතික හමුදාවට අමෙරිකානු ඩොලර් බිලියන 4ක ආයුධ අලෙවි කිරීම සඳහා පාකිස්තානය සමඟ ආරක්ෂක සහයෝගිතා ගනුදෙනුවකට එකඟතාව පළ වී ඇතැයි රොයිටර්ස් පුවත් සේවය වාර්තා කළේය.
පසුගිය සතියේ පාකිස්තාන හමුදාපති ෆීල්ඩ් මාෂල් අසීම් මුනීර් සහ ලිබියාවේ ජාතික හමුදාවේ නියෝජ්ය හමුදාපති සදාම් කලීෆා හෆ්තාර් අතර නැඟෙනහිර ලිබියාවේ බෙන්ගාසි නගරයේදී එම ගනුදෙනුව සම්බන්ධ අවසන් සාකච්ඡාව පැවති බවත්, එය පාකිස්තාන ඉතිහාසයේ විශාලතම ආයුධ ගනුදෙනුවක් බවත්, රොයිටර් පුවත් සේවය වැඩිදුරටත් වාර්තා කළේය.
ගනුදෙනුවේ රහසිගතභාවය ආරක්ෂා කිරීම හේතුවෙන් සාකච්ඡාවට එක් වූ දෙරටේ නිලධාරීන් පිළිබඳ තොරතුරු වාර්තා නොවන බව ද රොයිටර් පුවත් සේවය සඳහන් කළේය.
ප්රහාරක ජෙට් යානා සහ පුහුණු ගුවන් යානා ඇතුළුව හමුදා උපකරණ අලෙවි කිරීම, පුහුණුව ඇතුළු පුළුල් උපායමාර්ගික සහයෝගීතාව වැඩිදියුණු කිරීම එම ගිවිසුමට ඇතුළත් වී ඇති අතර, ගිවිසුම සම්බන්ධයෙන් එම සාකච්ඡා ආසන්න වශයෙන් වසර දෙකහමාරක කාලයක් පුරා පවත්වා ඇතැයි ද වාර්තා වේ.
වසර 2011 දී එක්සත් ජාතීන්ගේ සංවිධානය විසින් ලිබියාවට පනවනු ලැබූ අවි සම්බාධක එම ගිවිසුම මඟින් උල්ලංඝනය නොවන බව පාකිස්තාන නිලධාරීන් සහතික කර ඇතැයි ද වාර්තා වේ.
එහෙත් නව ගිවිසුමෙන් ලිබියාවේ අභ්යන්තර ගැටුම් පාලනය කිරීමේ ජාත්යන්තර උත්සාහය මෙමඟින් අවදානමට ලක්වීමේ අවදානමක් මතු වී ඇතැයි ද, එහි දේශපාලනික සහ උපායමාර්ගික ප්රතිවිපාක පාලනය කිරීම දුෂ්කර වනු ඇතැයි ද රොයිටර් පුවත් සේවය සඳහන් කර තිබේ.
