ශ්‍රී ලංකාවේ උපන් ස්විට්සර්ලන්ත පාර්ලිමේන්තු මන්ත්‍රීවරියක වන පැරා රූමි, එරට ජාතික සභාවේ දෙවන උප සභාපතිනිය ලෙස නිල වශයෙන් තේරී පත් වී තිබේ.

ඉතිහාසයේ ප්‍රථම වතාවට ශ්‍රී ලාංකිකයෙකු ස්විට්සර්ලන්ත පාර්ලිමේන්තුවේ ඉහළ තනතුරකට තේරී පත් වූ අවස්ථාව මෙයයි.

34 හැවිරිදි පැරා රූමි, වෘත්තියෙන් හෙදියක් සහ වෛද්‍ය වෘත්තිකයක් වන අතර ඇය ස්විට්සර්ලන්තයේ සමාජ ප්‍රජාතන්ත්‍රවාදී පක්ෂයේ සාමාජිකාවකි.

කොළඹ බිෂොප් විද්‍යාලයෙන් ප්‍රාථමික අධ්‍යාපනය සම්පූර්ණ කළ පැරා, 1998 දී වයස අවුරුදු 6 දී තම පවුල සමඟ ස්විට්සර්ලන්තයට ගියාය.

ඇය 2021 දී ග්‍රෙන්චෙන් නගර සභාවට තේරී පත්වීමෙන් ඇගේ දේශපාලන ජීවිතය ආරම්භ කළාය.

ඇයගේ වර්තමාන පත්වීමත් සමඟ, 2027 දී ඇය නැවත පාර්ලිමේන්තුවට තේරී පත් වුවහොත්, 2028 දී ස්විට්සර්ලන්ත පාර්ලිමේන්තුවේ සභාපතිනිය බවට පත්වන බව වාර්තා වේ.

පාර්ලිමේන්තු මන්ත්‍රීවරියක් ලෙස, ඇය ප්‍රධාන වශයෙන් සෞඛ්‍ය ප්‍රතිපත්ති, සමාජ ප්‍රතිපත්ති, විදේශ ප්‍රතිපත්ති සහ සැමට සමාන අවස්ථා වැනි කරුණු වෙනුවෙන් පෙනී සිටී.

ඊට අමතරව, ඇය ආබාධ සහිත පුද්ගලයින් බලගන්වන සංවිධානවල ක්‍රියාකාරීව සම්බන්ධ වේ. ඇය ලබන වසරේ මුල් භාගයේදී ඇගේ මව් රට වන ශ්‍රී ලංකාවට පැමිණීමට ද සැලසුම් කරමින් සිටී.